काठमाडौं । खेलको ७५औँ मिनेटसम्म ३–० ले पछि परेको अवस्था उल्टाउदै युभेन्ट्सले इटालियन सिरी ‘ए’मा बोलोग्नासँग ३–३ को बराबरी गर्दै अंक बाँडेको छ । सोमबार राति घरेलु मैदानमा बोलोग्ना ३–० को सहज अग्रता जोगाउन नसक्दा अंक बाँड्न बाध्य बन्यो ।

घरेलु टिमका रिकार्डाे कालाफिओरीले दोस्रो मिनेटमा गोल गर्दै बोलोग्नालाई अग्रता दिलाएका थिए । सान्टियागो कास्ट्रोले ११औँ मिनेटमा गोल गरेपछि घरेलु टिमले अग्रता दोब्बर बनाएको थियो । ५३औँ मिनेटमा कालाफिओरीले दोस्रो गोल गर्दा बोलोग्नाले ३–० को अग्रता बनाएको थियो ।

तर, युभेन्ट्सका फेडेरिको चिसाका ७६औँ मिनेटमा गोल गरे । अर्काडिउस मिलिकले ८३औँ मिनेटमा गोल गर्दै पाहुना टिमलाई ३–२ को अवस्थामा ल्याएका थिए । केनान यिल्डिजले ८४औँ मिनेटमा गोल गर्दै युभेन्ट्सको सम्भावित हार टारेका थिए ।

बराबरीसँगै युभेन्ट्स तालिकाको चौथो स्थानमा झरेको छ । ३७ खेलपछि युभेन्ट्सलाई पछि पार्दै बोलोग्ना तेस्रो स्थानमा उक्लिएको हो । दुवै टिमको समान ६८ अंक रहे पनि गोल आधारमा बोलोग्ना युभेन्टसभन्दा अगाडि छ ।