काठमाडौं । नेपाली कांग्रेसका सांसद धनराज गुरुङले गृहमन्त्री रवि लामिछानेले संसद्को अवहेलना गरेको भन्दै कारबाही गर्न माग गरेका छन् । उनले सोमबार संसद् सचिवालयमा निवेदन दिँदै गृहमन्त्रीले आइतबारको सदनमा मानमर्दन गरेको बताएका छन् ।

कांग्रेस उपसभापति समेत रहेका गुरुङले दिएको निवेदनमा गृहमन्त्री लामिछानेले अदालतको फैसलामाथि धावा बोलेको, अदालतको अवहेलना गरेको उल्लेख छ । 

त्यस्तै, अदालतबाट सफाइ पाइसकेका रातो कूटनीतिक पासपोर्टको विषयलाई तोडमोड गरी प्रस्तुत गरी भ्रम श्रृजना गर्न खोजेको भन्दै आरोप प्रमाणित गर्न चुनौती समेत दिएका छन् । उनले कूटनीतिक राहदानी दुरुपयोग गरेको भन्ने आरोपको सम्बन्धमा सर्वोच्च अदालतले २०६४ असोज २४ गते गरेको फैसलाको प्रतिलिपी यसै निवेदनसँगै पठाएका छन् ।