मनाङ । मनाङमा आठ महिनामा ९५० सवारीचालक कारबाहीमा परेका छन् । आर्थिक वर्ष २०८०/८१ को आठ महिनामा ५६ ट्रक, ८३४ कार/जिप, ५० ट्याक्टर र १० मोटरसाइकल गरी सवारीचालक कारबाहीमा परेका हुन् । 

प्रहरी नायव उपरीक्षक एवम् प्रमुख नरेशकुमार सिंहले कारबाहीबाट नौ लाख ९३ हजार ५०० राजस्व संकलन भएको छ । त्यसमध्ये ट्रक कारबाहीबाट ५१ हजार, कार जिपबाट आठ लाख २९ हजार ५००, ट्याक्टर कारबाहीबाट ५२ हजार, मोटरसाइकल कारबाहीबाट सात हजार रुपैयाँ राजस्व संकलन भएको उनले बताए ।

चालु आवको साउनमा ८० सवारीचालकबाट ८१ हजार ५००, भदौमा ६७ बाट ६५ हजार, असोजमा १४५ बाट एक लाख ४८ हजार ५०० र कात्तिकमा २९१ सवारीचालक कारबाहीबाट दुई लाख ९५ हजार ५०० राजस्व संकलन भएको छ । यस्तै मंसिरमा १७५ सवारीचालकबाट एक लाख ६६ हजार, पुसमा ४३ बाट ३८ हजार ५००, माघमा १५ बाट ११ हजार ५००, फागुनमा ४२ बाट ३४ हजार र चैतमा ९२ सवारीचालक कारबाहीमा परेकाले ९९ हजार राजस्व संकलन गरेको प्रहरीले जनाएको छ । 

मनाङमा कम सवारीसाधन सञ्चालन हुने गरे पनि कानुनी तथा ट्राफिक नियम पालना नगर्दा कारबाहीमा पर्ने गरेका छन् । त्यसैले ट्राफिक नियमको पालना गर्न  जिल्ला प्रहरी कार्यालयले सबैलाई अनुरोध गरेको छ । 

समय समयमा ट्राफिक नियमको पालना गराउने उद्देश्यले विद्यालयस्तरीय कार्यक्रम तथा स्थानीयस्तरमा सचेतनामूलक कार्यक्रम सञ्चालन गर्ने गरिएको प्रमुख सिंहले बताए । उनले भने, “मनाङजस्तो विकट ठाउँमा सवारी कारबाही गर्न नपर्ने गरी ट्राफिक नियमको पालना गराउनमा प्रहरी लागिपरेको छ । यसलाई थप व्यवस्थित गर्दै लैजाने छौँ ।” रासस