काठमाडौं । प्रतिनिधिसभाको बैठक आउँदो जेठ ३ गतेसम्मका लागि स्थगित भएको छ । 

प्रतिपक्षी नेपाली कांग्रेसले प्रतिनिधिसभाको बैठक अवरोध गरेपछि सभामुख देवराज घिमिरेले बैठक ३ गते बिहान ११ बजेसम्मका लागि स्थगित गरेका हुन् । 

कांग्रेसको अवरोधका कारण राष्ट्रपति रामचन्द्र पौडेललाई धन्यवाद ज्ञापन गर्ने प्रस्ताव प्रस्तुत हुन सकेन । 

पौडेलले मंगलबार संघीय संसद्को दुवै सदनको संयुक्त बैठकमा सरकारको नीति तथा कार्यक्रम प्रस्तुत गरेका थिए । साँझ बसेको बैठकमा सम्बोधनका लागि राष्ट्रपतिलाई धन्यवाद दिने कार्यसूची थियो । तर, कांग्रेसले सहकारी अपचलन प्रकरणमा गृहमन्त्री रवि लामिछानेमाथि अनुुसन्धान गर्नका लागि संसदीय छानबिन समिति नबनाएसम्म सदन चल्न नदिने अडान राखिरहेको छ । 

कांग्रेसले छानबिन समितिको माग राख्दै केही समययता संसद् अवरोध गर्दै आइरहेको थियो । बिहान बसेको कांग्रेस संसदीय दलको बैठकले नीति तथा कार्यक्रम प्रस्तुत गर्न दिने र त्यसपछि अवरोध कायम राख्ने निर्णय गरेको थियो ।