काठमाडौं । नेकपा (एकीकृत समाजवादी)का अध्यक्ष माधव नेपालले संसद्को अतिरोध अन्त्य गर्ने विषयमा भइरहेको छलफलमा पार्टीलाई बेवास्ता गरिएको गुनासो गरेका छन् । बालकुमारीमा मंगलबारबाट सुरू भएको केन्द्रीय कमिटीको बैठकमा उनले भइरहेका गतिविधिबारे पत्रपत्रिकाबाट थाहा पाउनुपरेको बताए । 

“कतिपय कुराको सन्दर्भमा हाम्रो पार्टीलाई सहभागी गराइएको छैन । यो पार्टीको के आवश्यकता छ भनेर हामीलाई बेवास्ता गर्ने गरिएको छ,” उनले भने, “संसद् चल्ने कि नचल्ने, अवरोध हटाउने कुराको सन्दर्भमा हामीले पत्रपत्रिकाबाट थाहा पाइरहेका छौं ।” 

उनले वार्ता छ भन्ने जानकारी समेत नगराइएको बताए । “हामीलाई त्यस्ता वार्तामा बोलाइँदैन । जानकारी पनि गराइँदैन । यी हाम्रा पीडा र वेदना आफना ठाउँमा छ,” उनले बैठकमा भने ।  अध्यक्ष नेपालले सत्ताका लागि मरिहत्ते गर्ने कि स्वाभिमानलाई कायम राखेर अघि बढ्ने हो भन्ने कुरामा सोच्नुपर्ने आवश्यकता रहेको बताए । 

उनले दिनदिनै घटनाक्रम परिवर्तनका भइरहेकाले सोहीअनुसार निर्णय गरेर अघि बढ्नुपर्ने बताए । सुदूरपश्चिम, मधेस र वाग्मती प्रदेशमा के हुने भन्ने निश्चित नरहेको नेपालको भनाइ छ । अध्यक्ष नेपालले नीति तथा कार्यक्रमा अन्तिम समयमा कस्तो बन्यो भन्ने हेर्न नपाएको बताए । केही छलफलमा सहभागी भए पनि कस्तो बन्यो भनेर संसदीय दललाई जानकारी नदिएकाे गुनासो गरे ।