ब्रिस्बेन । अस्ट्रेलियामा एक किशोरले चक्कु प्रहारबाट बेलायती महिलाको  हत्या गरेकामा उनलाई १४ वर्षको जेल सजाय सुनाइएको छ ।

इम्मा लोभेल नामकी ४१ वर्षीया महिलाको ब्रिस्बेनमा दुई पक्षबीचको झडपका क्रममा मृत्यु भएको थियो । उक्त घटना सन् २०२२ मा बक्सिङ दिवसको दिन भएको थियो ।

उनी बेलायतको सुफोल्कबाट २०११ मा छोरीहरू र पति लीसँग त्यहाँ गएकी थिइन् । आक्रमणमा पति पनि घाइते भएका थिए ।

आक्रमण गर्ने किशोर त्यति बेला १७ वर्षका मात्र भएकाले उनको नाम उल्लेख गरिएको छैन । उनी यो वर्षको सुरुमा हत्या अभियोगमा दोषी ठहर भएका थिए । अहिले १९ वर्षका रहेका उनलाई सोमबार ब्रिस्बेनको सर्वोच्च अदालतले जेल सजाय तोकेको हो ।

अदालतमा न्यायाधीश टोम सोलेभुले लोभेलको हत्या जघन्य अपराध भएको बताएका थिए । “लोभेलको एउटा प्रिय परिवार थियो, जसले नयाँ देशमा आफ्नो जीवन जिउन चाहिरहेको थियो,” उनले भनेका छन् । सुरक्षित जीवनयापनको अधिकारको उल्लंघन भएको उनले जनाए ।

अदालतमा गराइएको जानकारीअनुसार, कुकुरले उठाएका कारण उनीहरू घरको बगैँचातर्फ गएका बेला ती किशोरहरूसँग झडप भएको थियो । त्यही बेला ११.५ सेन्टिमिटरको चक्कु लोभेलको छातीमा प्रहार गरिएको थियो । प्रहरी र स्वास्थ्यसम्बन्धी काम गर्ने व्यक्ति त्यहाँ पुग्दा लोभेलका दुई छोरी आमाको शरीरसँगै रोइरहेका थिए ।

उपचारका निम्ति अस्पताल पुर्‍याउनासाथै उनको मृत्यु भएको थियो । लोभेलको परिवारले हत्यारालाई आजीवन कारावासको माग यसअघि नै गरेको थियो । हत्याका घटनामा आजीवन कारावासको व्यवस्था भए पनि आक्रमणकारीलाई नाबालिगका रूपमा सजाय तोकिएको छ । बीबीसीबाट ।