काठमाडौं । लियोनल मेसीको कप्तानीमा रहेको इन्टर मियामीले मेजर लिग सकर (एमएलएस)मा मोन्टरियालविरुद्ध ३–२ को पुनरागमन जित निकालेको छ ।

आइतबार बिहान भएको खेलमा मियामीले २–० ले पछि परेको अवस्था उल्ट्याउँदै जित निकालेको हो । मियामीलाई जित दिलाउन माटियस रोजास, लुइस स्वारेज र बेन्जामिन क्रेमास्चीले गोल गरे । मोन्टरियालका ब्रायस डुक र जुलेस एन्थोनी भिल्सेन्टले गोल गरे ।

खेलको २२औँ मिनेटमा डुकले गोल गर्दै मोन्टरियाललाई अग्रता दिलाएका थिए । त्यसको १० मिनेटपछि भिल्सेन्टले गोल गर्दै मोन्टरियालको अग्रता दोब्बर बनाएका थिए । ४४औँ मिनेटमा रोजासले गोल गरेपछि मियामीले मोन्टरियालको अग्रता २–१ मा झारेको थियो । पहिलो हाफको इन्जुरी समयमा स्वारेजले गोल गरेपछि मियामी खेलमा फर्कियो ।

यस्तै, ५९औँ मिनेटमा क्रेमास्चीले गोल गरेपछि मियामीले ३–२ को पुनरागमन जित निश्चित गरेको हो ।

जितसँगै १३ खेलबाट २७ अंक जोडेको मियामी लिगको इस्र्टन कन्फेरेन्सको शीर्ष स्थानमा छ । ११ खेलबाट १२ अंक जोडेको मोन्टरियाल तालिकाको १२औँ स्थानमा छ ।