क्वालालाम्पुर । मलेसियाले आफ्नो पाम तेलको खरिद गर्ने मुख्य व्यापारिक साझेदारलाई उपहारको रूपमा ओराङगुटान दिने जनाएको छ ।  कमोडिटिज (वस्तुहरू)सम्बन्धी मन्त्री जोहारी अब्दुल घानीले चीनले ‘पाण्डा डिप्लोमेसी’ गरे जस्तै आफूहरूले पनि व्यापारिक साझेदारलाई उपहारको रूपमा ओराङगुटान दिने प्रस्ताव अघि सारेको जनाएका छन् । तर, संरक्षणसम्बन्धी समूह डब्ल्यूडब्ल्यूएफले भने ओराङगुटानलाई तिनीहरूको प्राकृतिक वासस्थानमा संरक्षण गर्नका लागि केन्द्रित हुनुपर्ने जनाएको छ । 

ठूलो खालको बाँदरका रूपमा लिइने ओराङगुटानको  मुख्य वासस्थान मलेसिया र इण्डोनेसियालाई मानिने गरेको छ । जोखिमको सूचीमा रहेको ओराङगुटानको नामको हिसाबले शाब्दिक अर्थ ‘वनको मान्छे’ हो । डब्ल्यूडब्ल्यूएफका अनुसार बोर्नियो प्रायद्वीपमा एक लाख पाँच हजार र सुमात्रा प्रायद्वीपमा केही हजार ओराङगुटान रहेका छन् । 

मलेसियन मन्त्री जोहरीले पाम तेलको आयातकर्ता खासगरी चीन, भारत र युरोपेली संघलाई ओराङगुटान उपहारको प्रस्ताव गरिएको जनाएका छन् । उनले एक्समा लेखेका छन्, “विश्व समुदायलाई यसले प्रमाणित गर्ने छ कि मलेसिया जैविक विविधता संरक्षणमा प्रतिबद्ध रहेको छ ।”

उनले मलेसियाले पाम तेलबारेमा रक्षात्मक दृष्टिकोण राख्न नसक्ने जनाउँदै यसको सट्टामा विश्वका देशहरूलाई मलेसिया पाम तेलको दीगो उत्पादक राष्ट्रका रूपमा देखाउनुपर्ने आवश्यकता भएको बताएका छन् । उनले मलेसिया वन र वातावरणीय दीगोपनको संरक्षणमा प्रतिबद्ध रहेको समेत जनाएका छन् ।

मलेसियाले चालेको यो कदम उसले आफ्नो आर्थिक विकासका लागि सद्‌भावनाको संकेत र जोखिमको सूचीमा रहेका प्रजातिलाई जोगाउने चाहनाको टोकनका रूपमा समेत लिइएको छ । तर, संरक्षणसम्बन्धी समूहले भने सो योजनाको विपक्षमा  आवाज उठाएका छन् ।

डब्ल्यूडब्लूएफले जंगली जनवारको संरक्षणमा समर्थन गरेको र व्यापारिक साझेदारलाई यो प्रक्रियामा समर्थनका लागि मलेसिया ल्याउन आग्रह गरेको छ । ओराङगुटानलाई देश बाहिर पठाउने योजनामा असहमति जनाउँदै डब्ल्यूडब्लूएफले जारी गरेको वक्तव्यमा जनाइएको रोयटर्सले उल्लेख गरेको  छ ।

यस्तै, जस्टिज फर वाइल्ड लाइफ मलेसियाले सो योजना पूरा गर्नका लागि थप अनुसन्धान हुनुपर्ने जनाउँदै योजना कार्यान्वयन गर्नुअघि वैकल्पिक कुटनीतिक प्रक्रियाबारे विचार गर्न आग्रह गरेको छ । पामको तेल चकलेट, मार्जरिन, कस्मेटिक र साबुनलगायत उत्पादनमा प्रयोग हुने गरेको छ । यो उत्पादनको लागि सजिलो भए पनि फस्टाउन ट्रपिकल (उष्णकटिबन्धीय) क्षेत्रको जरुरी पर्दछ । बीबीसी