रियाद । आउँदो जुन २ देखि सुरु हुन लागेको हज यात्राको लागि साउदी अरेबियाको गृह मन्त्रालयले कडा नियम जारी गरेको छ । नियम कार्यान्वयन नगर्नेलाई कारबाहीको चेतावनी दिएको छ ।
गृह मन्त्रालयले हज यात्राको क्रममा नियम उल्लंघन गर्नेलाई करिब २७०० डलर सम्मको जरिबाना हुन सक्ने जनाइएको छ । मन्त्रालयका अनुसार बिनाअनुमति हज यात्रा गरिनुलाई अवैध मानिने र उनीहरूलाई आफ्नै देशमा फिर्ता गरिनेछ । नियम उल्लंघन गर्नेलाई निर्धारित समयसम्म साउदी अरेबिया जान पनि रोक लगाउन सकिनेछ ।
सुरक्षाका कारण यो कदम उठाइएको साउदी सरकारको भनाइ छ । यसैगरी बिनाअनुमति पवित्रस्थल मक्का तथा सुरक्षा नियन्त्रण क्षेत्रमा जान पनि रोक लगाइएको छ । यो नियम जुन २ देखि जुन २० सम्मका लागि लागु हुने जनाइएको छ । बीबीसी