काठमाडौं । जनता समाजवादी पार्टी, नेपालले आफू पुष्पकमल दाहाल  ‘प्रचण्ड’ नेतृत्वको सरकार अर्को निर्वाचनसम्म निरन्तर रहनुपर्ने पक्षमा रहेको जनाएको छ । बुधबार सञ्चारकर्मीसँग पार्टी प्रवक्ता मनिष सुमनले यही गठबन्धनको निरन्तरताको पक्षमा जसपा नेपाल रहेको बताए । 

“यही गठबन्धन अर्को निर्वाचनसम्म रहिरहनुपर्दछ,” उनले भने, “फागुन २१ गतेदेखि प्रचण्डजीको नेतृत्वमा बनेको नयाँ समीकरणको आठबुँदे सहमतिको हस्तारकर्तामध्येको पार्टी हौँ । जग रोप्ने पार्टी हौैँ, यो सरकार अर्को निर्वाचनसम्म निरन्तर रहनुपर्छ भन्ने मान्यता राखेका छौँ । यसका विकल्पबारे कहिल्यै सोचेनौँ ।”

उनले ०७९ को निर्वाचनले कुनै दललाई बहुमत नदिएकाले मिलेरै अघि बढ्नुपर्ने बताए । सुमनले पार्टी विभाजन गर्न ठूलै शक्तिविरुद्ध लागेको दाबी गरे । पार्टीका ठूलै पदमा रहेको नेताहरू आगो लगाएर हिँडेको उनले टिप्पणी गरे । 

जसपा, नेपाल विभाजन गरी अशोक राई नेतृृत्वमा जसपा दर्ता भइसकेको छ ।