काठमाडौं । जिल्ला ट्राफिक प्रहरी कार्यालय कपिलवस्तुले पछिल्लो आठ महिनामात्रै दुई करोड पाँच लाख ३९ हजार ५०० रुपैयाँ राजस्व संकलन गरेको छ । जुन अघिल्लो आर्थिक वर्षको भन्दा बढी हो ।

कपिलवस्तु ट्राफिक प्रहरीले अघिल्लो आर्थिक वर्ष २०७९/०८० मा कुल एक करोड ७७ लाख ११ हजार रुपैयाँ राजस्व संकलन गरेको थियो ।

प्रहरी निरीक्षक अनिश भण्डारीले ट्राफिक प्रहरीको कमान्ड सम्हालेसँगै ट्राफिक नियमको पालनामा कडाइ गरिँदा राजस्व संकलन उच्च भएको हो ।

चालु आर्थिक वर्षसहित तीन आर्थिक वर्षमा ट्राफिक प्रहरी कार्यालय कपिलवस्तुले मात्रै सात करोड ४८ लाख ८७ हजार ५०० राजस्व संकलन गरेको छ ।

जसअन्तर्रगत चार हजार ६१२ बस, ६७ हजार ९९८ ट्रक, १७ हजार १९ कार तथा जिप, १८ हजार ५९९ मोटरसाइकल, तीनहजार ३३० ट्याक्टर र ७७९ अटोरिक्सा कारबाहीमा परेको देखिएको छ ।

ट्राफिक नियम उल्लंघनको घटना बढ्न थालेपछि ट्राफिक प्रहरीले एक हजार ८३२ वटा जनचेतनामूलक कार्यक्रमसमेत गरेको छ । जसमा ५७ हजार ५४३ जना सचेतना कक्षमा सहभागी भएका थिए ।

राजस्व संकलनमा राम्रो काम गरेको भन्दै तत्कालीन लुम्बिनी प्रदेश प्रहरी प्रमुख डीआईजी उमेशराज जोशीबाट भण्डारी पुरस्कृतसमेत भएका थिए ।