काठमाडौं । उपप्रधान एवं स्वास्थ्य तथा जनसंख्या मन्त्री उपेन्द्र यादव र संयुक्त राष्ट्रसंघका महासचिव एन्टोनियो गुट्टेरेसबीच भेटवार्ता भएको छ ।

भेटवार्ता संयुक्त राष्ट्रसंघको मुख्यालय न्यूयोर्कमा सोमबार भएको हो । महासचिव गुट्टेरेसले उपप्रधानमन्त्री यादवलाई संयुक्त राष्ट्रसंघको मुख्यालयमा स्वागत गर्दै नेपाल र संयुक्त राष्ट्रसंघबीचको सम्बन्ध र सहयोग प्रगाढ रहि आएकोमा खुसी व्यक्त गरेका थिए ।

उनले आफ्नो नेपाल भ्रमणको स्मरण गर्दै नेपालले मानवअधिकार, विश्व शान्ति र सुरक्षा एवं दिगो विकासका लक्ष्यहरुको प्राप्तिमा पुर्‍याएको योगदानको प्रशंसा गरेका थिए ।

शान्ति स्थापनार्थ संयुक्त राष्ट्रसंघअन्तर्गत शान्ति सेना पठाउने मुलुकहरूमा नेपाल अग्रस्थानमा रहेको बताउँदै नेपाली शान्ति सेनाले खेलेको भूमिकाको उनले सराहना गरेको संयुक्त राष्ट्रसंघका लागि नेपाली स्थायी नियोगद्वारा जारी विज्ञप्तिमा उल्लेख छ ।

नेपालले जलवायु परिवर्तनको असर भोग्नु परेकोले सोको असरलाई सम्बोधन गर्न ‘क्लाइमेट जस्टिस’को आधारमा न्यूनीकरण तथा अनुकुलन सहायता पाउनु पर्नेमा उनले जोड दिए । “यो नेपालको अधिकार हो,” उनले भने ।

उक्त भेटको क्रममा उपप्रधानमन्त्री यादवले संयुक्त राष्ट्रसंघको चार्टर एवं सिद्धान्तप्रति नेपाल प्रतिबद्ध रहेको बताउँदै नेपालको सामाजिक आर्थिक विकासमा संयुक्त राष्ट्रसंघको योगदानको प्रशंसा गरेका थिए ।

नेपालले गरिबी निवारण, स्वास्थ्य सेवाको विकास, विस्तार, कुल प्रजननदर र मातृ मृत्युदर घटाउनेलयागतका महत्वपूर्ण उपलब्धिहरू हासिल गरेको जानकारी उनले दिएका थिए । 

तथापि, नेपाल अतिकम विकसित र भूपरिवेष्ठित मुलुक रहेको एवं जलवायू परिवर्तन र विश्वमा बढ्दो द्वन्द्वको कारणले गर्दा नेपालले दिगो विकासका लक्ष्यहरुका साथै स्वास्थ्य क्षेत्रमा प्राप्त गरेका उपलब्धिहरूलाई जोगाई राख्न निकै चुनौतीपूर्ण रहेका उपप्रधानमन्त्री यादवले बताएका थिए ।

संयुक्त राष्ट्रसंघलगायतका अन्तर्राष्ट्रिय विकास साझेदार मुलुकहरूले सार्थक सहयोगको सलागि उनले राष्ट्रसंघका महासचिवसँग अनुरोध गरेका थिए ।

उक्त भेटघाटमा संयुक्त राष्ट्रसंघका लागि नेपालका स्थायी प्रतिनिधि लोकबहादुर थापासहित नेपाल सरकारका उच्चपदस्थ कर्मचारीहरू उपस्थित थिए ।

संयुक्त राष्ट्रसंघको मुख्यालयमा यही अप्रिल २९ देखि मे ३ सम्म आयोजना भइरहेको जनसंख्या तथा विकास आयोगको ५७ औं सत्रमा भाग लिने क्रममा उपप्रधानमन्त्री यादव न्यूयोर्कमा रहेका छन् ।