काठमाडौं । छैटौँ साहना प्रधान स्मृति राष्ट्रिय महिला हक्की प्रतियोगिताको उद्घाटन खेलमा विभागीय टिम नेपाल आर्मी क्लबले जित निकालेको छ । शनिबार भएको उद्घाटन खेलमा आर्मीले गण्डकी प्रदेशलाई ३–० ले हराएको हो ।
धुलिखेल खेल मैदानमा आर्मीलाई जित दिलाउन सीमा खड्का, डम्मरा भट्ट र सरस्वती तामाङले एक/एक गोल गरे । खेलको २१औँ मिनेटमा सीमाले गोल गर्दै टिमलाई अग्रता दिलाइन् । डम्मराले ५०औँ मिनेटमा गोल गर्दै टिमको अग्रता दोब्बर बनाइन् । सरस्वतीले ५६औँ मिनेटमा टिमका निम्ति तेस्रो गोल गरिन् । जितसँगै आर्मीले तीन अंक जोड्यो ।
प्रतियोगिताअन्तर्गत शनिबार नै भएको दोस्रो खेलमा लुम्बिनी प्रदेशले अग्रता जोगाउन नसक्दा मधेस प्रदेशसँग १–१ गोलको बराबरी खेल्यो ।
प्रतियोगितामा आर्मी, वाग्मती प्रदेश, गण्डकी, लुम्बिनी, मधेस र सुदूरपश्चिम प्रदेश गरी ६ टिमको सहभागिता छ । सहभागी टिमलाई दुई समूहमा विभाजन गरी लिग कम नकआउटका आधारमा खेल खेलाइएको छ ।
प्रतियोगितामा पहिलो हुने टिमले एक लाख, दोस्रोले ७५ हजार र तेस्रो हुनेले ५० हजार रुपैयाँ नगद पुरस्कार र प्रमाणपत्र प्राप्त गर्नेछन् ।
