काठमाडौं । तीन महिनादेखि खाली रहेको नेपाल पर्यटन बोर्डको कार्यकारी अधिकृत (सीईओ) छनोटको प्रक्रिया अन्तिम चरणमा पुगेको छ ।

गत माघ १६ गते तत्कालीन सीईओ धनन्जय रेग्मीको कार्यकाल सकिएपछि बोर्ड नेतृत्वविहीन बनेको थियो । रिक्त रहेको पदका लागि बोर्डले गत चैत २४ गते दरखास्त आह्वान गरेको थियो ।

जसमा १६ जनाले आवेदन दिएका छन् । आवेदन दिनेमा बोर्डका पूर्व सीईओदेखि कर्मचारीसम्म रहेका छन् ।

जसमा पूर्वसीईओ दीपकराज जोशी र निवर्तमान सीईओ धनन्जय रेग्मीले पनि छन् ।

यसैगरी, पर्यटन बोर्डका वरिष्ठ निर्देशक हिक्मतसिंह ऐर, निमित्त निर्देशक लक्ष्मण गौतम, प्रबन्धक नवीन पोखरेल, प्रबन्धक श्रद्धा गौतम, वरिष्ठ अधिकृत सन्तोष विक्रम थापाले पनि आवेदन दिएका छन् ।

यस्तै, ठाकुरप्रसाद देवकोटा, विजय नेपाल, राजाराम गिरी, राजाराम केसी, ज्ञानिन राई, ज्ञानेश्वरप्रसाद सिंह महतो, सूर्यबहादुर घिमिरे, दीपक बस्ताकोटी र रामचन्द्र सेढाईको पनि आवेदन परेको छ ।

मन्त्री भन्छन्– हाम्रो दबाब हुँदैन

संस्कृति, पर्यटन तथा नागरिक उड्डयनमन्त्री हितबहादुर तामाङले सीईओ छनोटमा मन्त्रालयबाट कुनै पनि दबाब नहुने बताएका छन् । सीईओ छनोटका लागि मन्त्रिपरिषद्ले नै छनोट समिति बनाएर अधिकार दिएकाले आफूहरूको कुनै भूमिका नहुने उनले बताए ।

सीईओ छनोटका लागि पूर्वपर्यटनमन्त्री सुदन किरातीको समयमा नै समिति गठन भएको थियो ।

“सीईओ छनोटका लागि समिति नै बनेको छ । उक्त समितिले काम गरिरहेको छ । मन्त्रालयको तर्फबाट कुनै खालको दबाब हुँदैन । समितिलाई अधिकार दिइएको छ । उक्त समितिले सर्तहरू राखेको छ । त्यही सर्तअनुसार छनोट हुन्छ,” मन्त्री तामाङले भने ।