बर्लिन । जर्मनीको दक्षिणपन्थी पार्टीका नेताको सहयोगीका रूपमा काम गरिरहेका एक व्यक्ति पक्राउ परेका छन् । चीनको लागि जासुसी गरेको आरोपमा मंगलबार पक्राउ परेका हुन् । जीयान जी नामका ४३ वर्षीय ती व्यक्ति अल्टरनेटिभ फर जर्मनी पार्टीबाट युरोपेली निर्वाचनका उमेदवार मेक्सिमेलियन क्राहका सहयोगी भएको त्यहाँका सञ्चार माध्यमले जनाएका छन् ।
अभियोजकले जनाएअनुसार उनी पूर्वी सहर ड्रेस्डेनमा पक्राउ परेका हुन् । उनले युरोपेली संसद्को सूचना चीनको गुप्तचर निकायलाई उपलब्ध गराउने गरेको आरोप लगाइएको छ । जीयानले चीनको विरोध गर्नेहरूको सूचना समेत दिने गरेको बताइएको छ । अल्टरनेटिभ फर जर्मनी पार्टीका प्रवक्ताले सो घटनालाई ‘धेरै नै विचलित गराउने खालको’ भन्ने टिप्पणी गरेका छन् ।
अभियोजकका अनुसार उनले सन् २०१९ देखि सो कार्य गर्दै आएका थिए । एक दिनअघि मात्रै अन्य तीन जर्मन नागरिक चीनको जासुसी गरेको आरोपमा पक्राउ परेका थिए । बीबीसी
