काठमाडौं । नेपाल प्रहरीको साइबर ब्युरोले सामाजिक सञ्जालबाट अश्लील गतिविधि गर्न लगाएर 'ब्ल्याक मेल' गरेको आरोपमा एक जनालाई पक्राउ गरेको छ ।
पक्राउ पर्नेमा सिन्धुलीको तीनपाटन गाउँपालिका–८ का ३६ वर्षीय कमलप्रसाद अधिकारी रहेका छन् । उनी काठमाडौंमा बूढानीलकण्ठ नगरपालिका–८ मा बस्दै आएका थिए ।
प्रहरीका अनुसार 'पाथीभरा माता' नाम गरेको फेक फेसबुक आईडीमार्फत अधिकारीले रोजगारीका विभिन्न प्रस्तावहरूको प्रचार गर्थे । उनले रोजगारीका लागि 'फिजिकल फिटनेस'को चेकजाँच गर्नुपर्ने बताएर पीडितहरूसँग नग्न फोटो र भिडियो माग्ने गर्थे । फोटो र भिडियो पाएपछि उनले आफूले भनेअनुसारका गतिविधि नगरे भिडियो तथा फोटो सामाजिक सञ्जालमा राखिदिने बताएर धम्की दिने गर्थे ।
साइबर ब्युरोको अनुसन्धान तथा प्राविधिक विश्लेषणबाट उनलाई पहिचान गरेर पक्राउ गरिएको ब्युरोका प्रहरी उपरीक्षक प्रवक्ता एवं सूचना अधिकारी दिपकराज अवस्थीले जानकारी दिए ।
उनीमाथि विद्युतीय कारोबार ऐन, २०६३ अन्तर्गतको कसुरमा काठमाडौं जिल्ला अदालतबाट सात दिनको समय लिएर अनुसन्धान भइरहेको छ ।
