काठमाडौं । प्रधानमन्त्री पुष्पकमल दाहाल ‘प्रचण्ड’ले पुनः वाम एकता हुने संकेत गरेका छन् । सोमबार नेकपा (एमाले)को पार्टी केन्द्रीय कार्यालय च्यासलमा आयोजित एक कार्यक्रममा उनले यस्तो संकेत गरेका हुन् ।

०७४ सालमा वाम एकता गरिएको स्मरण गर्दै उनले राम्रो कामका निम्ति प्रयास जारी राख्ने बताए । त्यति बेला वाम एकता आमजनताबाट अनुमोदन भएको उनले उल्लेख गरे ।

“...०७४ को चुनावमा जे प्रयोग हामीले गर्‍यौँ, त्यो एकताको प्रयोग थियो र त्यसलाई जनता र आमनेता–कार्यकर्ताले अनुमोदन गरेको पनि हो । विभिन्न कारणले त्यसलाई बचाउन सकेनौँ,” उनले भने, “तर, एकपटक असम्भव भयो भन्दैमा सही कामको निम्ति हामीले प्रयासलाई छोड्न हुँदैन । हामी निरन्तर प्रयास गरी नै राख्नुपर्छ ।”

उनले राष्ट्रिय स्वाधीनता, लोकतन्त्रको सुदृढीकरण र जनताका दैनिक समस्या समाधानका निम्ति समाजवादको विकल्प नरहेको बताए । समाजवाद नै अबको क्रान्तिको बाटो भएको उनको भनाइ छ ।

उनले कम्युनिस्टहरू कुनै न कुनै रूपले सहकार्य र एक हुन आवश्यक रहेको औँल्याए । चुनौतीको सामना र जोखिम उठाउँदै अघि बढ्ने कम्युनिस्ट आन्दोलन र वर्गसंघर्षको नियम भएको उनले बताए ।

“...कुनै न कुनै रूपले सहकार्य र कुनै न कुनै रूपले एकतामा जान आवश्यक छ । अहिले धेरै जोखिम र चुनौती भए पनि हामी, कमरेड माधवजी (माधवकुमार नेपाल)ले मतिर हेरेर प्रधानमन्त्रीज्यूले नै भन्नुहोला भन्नुभयो,” उनले भने, “म के भन्छु भने चुनौतीको सामना र जोखिमहरू उठाउँदै अघि बढ्ने कम्युनिस्ट आन्दोलन र वर्गसंघर्षको नियम नै हो ।” न्युज एजेन्सी नेपाल