काठमाडौं । चलचित्र ‘होस्टेल’को तेस्रो भाग ‘होस्टेल–३’ बन्ने भएको छ । चलचित्रको तेस्रो भागलाई सशान कँडेलले निर्देशन गर्नेछन् । सिनेमाको कथा पनि निर्देशक स्वयंले लेखेका छन् । 

‘होस्टेल’ र ‘होस्टेल रिटर्न्स’ सुनिल रावलले निर्माण गरे पनि तेस्रो सिरिजमा भने उनको लगानी रहने छैन । उनी सिनेमामा कलाकारको रूपमा रहनेछन् । 

यसमा निर्माता शिशिर ज्ञवाली र कार्यकारी निर्माता शंकर कोइराला हुनेछन् । सह–निर्माताहरू सुधा मरहट्ठा, सुरेश कँडेल र अर्जुन सापकोटा रहेका छन् ।

‘होस्टेल’लाई हेमराज बिसी र ‘होस्टेल रिटर्न्स’लाई सुरज भुसालले निर्देशन गरेका थिए । 

‘होस्टेल–३’का निर्देशक कँडेलले तेस्रो भागमा होस्टेलमा बसेर अध्ययन गरिरहेका टिनेजर र उनीहरूको भविष्यमा आधारित रहने बताएका छन् । 

पहिलो पटक चलचित्र निर्देशन गर्न लागेका सशान डेढ दशकदेखि गायन र म्युजिक भिडियो निर्देशनमा छन् ।