काठमाडौं । तनहुँको आँबुखैरेनी गाउँपालिकाले मर्स्याङ्दी जलविद्युत् केन्द्रको जलाशयमा मोटरबोट सुरु गरेको छ । मोटरबोट सेवा प्रदायक कम्पनी बोटेबोराले गाउँपालिकासँग सम्झौता गरी आइतबारदेखि यसको व्यावसायिक सञ्चालन गरेको कम्पनीका अध्यक्ष बीबी (विष्णु) ढकालले जानकारी दिए ।

ढकालका अनुसार, जलाशयमा तत्काल एक करोड रुपैयाँ लगानीमा मोटरबोट सञ्चालन गरिएको हो । थप लगानी गरी जलाशय किनारमा बिच रेस्टुरेन्ट, फ्लोटिङ डेक, रिभर भ्यु पोइन्ट, शौचालय र मोटरबोट सर्भिस सेन्टरसहितका संरचना बनाउने योजना रहेको कम्पनीले जनाएको छ ।

मोटरबोट उत्पादक नेपाल सिप एन्ड बोट बिल्डिङले निर्माण गरेका अग्नि र फिस्टेल नामका दुई मोटरबोट सञ्चालनमा ल्याइएको छ ।

कति लाग्छ शुल्क ?
मोटरबोटमा घुम्न लाग्ने समयानुसार फरक–फरक शुल्क कायम गरिएको छ । मोटरबोटमा सयर गर्न ६ देखि ८ मिनेटसम्म प्रतिव्यक्ति २५० रुपैयाँ,  १० देखि १२ मिनेटका निम्ति ५०० र १५ देखि २० मिनेटका लागि एक हजार रुपैयाँ शुल्क लाग्ने कम्पनीले जनाएको छ ।

कसरी पुग्ने ?
मुग्लिनबाट पोखरातर्फ १४ किलोमिटर र डुम्रे बजारबाट काठमाडौंतर्फ १० किलोमिटर यात्रा गरेपछि बोटेबोराको मोटरबोट स्टेसन पुगिन्छ ।