काठमाडौं । दीपेन्द्रसिंह ऐरीको विस्फोटक ब्याटिङमा नेपालले कतारलाई जितका निम्ति विशाल रनको लक्ष्य प्रस्तुत गरेको छ । एसीसी मेन्स प्रिमियर कपअन्तर्गत ओमानको अल अमेरत क्रिकेट मैदानमा आफ्नो दोस्रो खेलमा नेपालले कतारसामु २११ रनको लक्ष्य प्रस्तुत गरेको हो ।

नेपालका लागि ऐरीले कीर्तिमानी खेल प्रदर्शन गरे । उनले एकै ओभरमा ६ छक्का प्रहार गर्दै यसअघि भारतका युवराज सिंहका नाममा रहेको कीर्तिमानको बराबरी गरेका छन् । पारीको अन्तिम ओभरमा बलिङ गर्न कतारका कमरान खान आएका थिए । उक्त ओभरको ६ बलमा ऐरीले ६ छक्का प्रहार गरेका हुन् ।

टस जितेर पहिले ब्याटिङ गरेको नेपालले निर्धारित २० ओभरमा सात विकेटको क्षतिमा २१० रन बनायो । नेपालका निम्ति ऐरीले सर्वाधिक ६४ रन बनाए । कुल २१ बल खेलेका उनले सात छक्का र तीन चौका प्रहार गरे ।

नेपालका लागि ओपनर आशिफ शेखले पनि अर्धशतकीय पारी खेले । उनले ४१ बलमा ६ चौकाको सहयोगमा ५२ रन बनाए । कुशल मल्लले १८ बल खेल्ने क्रममा तीन छक्का र दुई चौकाको सहयोगमा ३५ रन बनाए । साथै, कप्तान रोहित पौडेलले १८, कुशल भुर्तेलले १२, सन्दीप जोराले सात, गुल्सन झा र विवेक यादवले पाँच/पाँच रनको योगदान दिए ।

कतारका निम्ति हिमांशु राठोर र मुसावर शाहले तीन/तीन विकेट लिए भने अमीर फारुकले एक विकेट लिए ।

आज नेपालको प्लेइङ ११ मा कप्तान रोहित पौडेल, कुशल भुर्तेल, आशिफ शेख, सन्दीप जोरा, गुल्सन झा, विवेक यादव, अभिनाश बोहोरा, सोमपाल कामी, दीपेन्द्रसिंह ऐरी, ललित राजवंशी र कुशल मल्ल छन् । रासस