काठमाडौं । सुदूरपश्चिम प्रदेश सरकार आज गठन हुने भएको छ । आफ्नो दलको नेतृत्वमा सरकार गठन हुने नागरिक उन्मुक्ति पार्टीले जनाएको छ । 

आज बनाइने नयाँ सरकारको नेतृत्व मुख्यमन्त्रीका रूपमा कैलाश चौधरीले गर्ने नागरिक उन्मुक्ति पार्टीकी अध्यक्ष रन्जीता श्रेष्ठले दाबी गरेकी छन् । त्यसबाहेक नागरिक उन्मुक्तिले थप एक मन्त्री र एक राज्यमन्त्री पाउने सहमति भएको उनले जानकारी दिएकी छन् । 

प्रधानमन्त्री पुष्पकमल दाहाल ‘प्रचण्ड’, नेकपा (एमाले)का अध्यक्ष केपी शर्मा ओली, नेकपा (एकीकृत समाजवादी)का अध्यक्ष माधवकुमार नेपाल र जनता समाजवादी पार्टी (जसपा)का अध्यक्ष उपेन्द्र यादवसहितको बुधबार बसेको बैठकमा सुदूरपश्चिम प्रदेश सरकारको नेतृत्व नागरिक उन्मुक्तिलाई दिने सहमति भएको उनको दाबी छ । 

नागरिक उन्मुक्तिले मुख्यमन्त्रीमा चौधरीका नाममा निर्णय गरेको अध्यक्ष श्रेष्ठले जानकारी दिइन् । “नयाँ वर्षमा सुदूरपश्चिम प्रदेशमा नागरिक उन्मुक्तिको नेतृत्वमा नयाँ सरकार बन्छ,” उनले बाह्रखरीसँग भनिन्, “शुक्रबार कैलाशजी मुख्यमन्त्री बन्दै हुनुहुन्छ ।”

पार्टीमा केही समय देखिएको मतभेद पनि टुंगिसकेको उनको भनाइ छ । “सुदूरपश्चिमका हाम्रा प्रदेश सांसदहरू सबै एकै ठाउँ बसेर पार्टी एक ढिक्का भएको सन्देश दिइसक्नुभएको छ,” उनले भनिन् ।