काठमाडौं । खेलकुद शिक्षासम्बन्धी शैक्षिक कार्यक्रमहरूको विकास गर्ने लक्ष्यसहित युवा तथा खेलकुद मन्त्रालय र काठमाडौं विश्वविद्यालयको बीचमा समझदारी भएको  । बुधबार मन्त्रालयमा समझदारी पत्रमा हस्ताक्षर भएको छ ।  

मन्त्रालयको तर्फबाट निमित्त सचिव शिवप्रसाद रेग्मी र काठमाडौं विश्वविद्यालयको तर्फबाट उपकुलपति प्रा. भोला थापाले हस्ताक्षर गरेका थिए ।

भविष्यमा खेलकुद विज्ञान, व्यवस्थापन र शिक्षालाई सँगसँगै लैजानका निम्ति साझेदारी गर्ने उद्देश्यसहित सम्झौतामा हस्ताक्षर भएको बताइएको छ । यसमा मुख्य गरी विश्वविद्यालयमा खेलकुद सम्बद्ध अध्ययन तथा अध्यापनका लागि छोटो अवधिको कोर्ससँगै स्नातक, स्नातकोत्तर र विद्यावारिधिका निम्ति समेत सम्भाव्यताको खोजी गर्ने विषयलाई प्राथमिकता दिइएको छ । 

सम्झौतामा हस्ताक्षर गर्ने कार्यक्रममा खेलकुदमन्त्री विराजभक्त श्रेष्ठले भने, “खेलकुद शिक्षाको क्षेत्रमा आज एउटा नवीन सुरुआतको साक्षी हुन पाउँदा निक्कै हर्षित छु । मलाई विश्वास छ आज हामीले काठमाडौं विश्वविद्यालयसँग मिलेर रोप्ने खेल शिक्षाको बिउले कुनै दिन देशले गर्व गर्ने गरेर फल पक्कै दिनेछ ।”