काठमाडौं । नेपाली कथानक चलचित्र ‘द रेड सुटकेस’ क्यूएफएक्स चेनमा रिलिज नहुने भएको छ । रिलिज डेट एक हप्ता पछाडि सार्न आग्रह गरिएको भन्दै निर्माण पक्षले सो सिनेमा क्यूएफएक्स चेनमा नलगाउने घोषणा गरेको छ । विश्वका प्रतिष्ठित फिल्म फेस्टिभलको फन्को लगाएर नेपालमा रिलिज हुन लागेको यो चलचित्र देशकै ठूलो मल्टिप्लेक्समा भने नलाग्ने भएको हो ।
अभिनेता विपीन कार्की यसमा कमजोरी कसको भन्नेबारे आफूले विस्तृतमा बुझिनसकेको तर विश्वले ‘रिकगनाइज’ गरेको सिनेमाले स्थान भने पाउनुपर्ने बताउँछन् । “क्यूएफएक्सले अरू चलचित्रले राम्रो व्यापार गरिरहेका छन्, त्यसैले एक शो पनि दिन्नौँ भनेको भए त्यो उसको गल्ती हो । यस्तो हो भने सम्बन्धित पक्ष कारबाहीको भागीदार हुनुपर्छ,” विपीन बाह्रखरीसँग भन्छन्, “तर होइन, आइफल प्रोडक्सनले अरू सिनेमाकै हाराहारीमा मेरो सिनेमाले पनि शो पाउनुपर्छ भनेको हो भने त्यो पनि गल्ती हो । त्यसैले यसमा म यही पक्षकै कमजोरी हो भन्न सक्तिनँ ।”
सिनेमा रिलिज हुनुअगाडि नै यो चल्दैन भनेर क्रिटिक्स बनेर हल सञ्चालकले आफैँ लगाउँदिनँ भनेको भए त्यो गलत हुने उनको धारणा छ । “कुन सिनेमालाई कति शो दिने भन्ने मापदण्ड के हो मलाई थाहा छैन,” उनी भन्छन्, “तर, हलमा लागेपछि नै दर्शक कति आउने वा नआउनेबारे थाहा हुन्छ ।”
भेनिस फिल्म फेस्टिभल र विश्वका अरू महोत्सवमा पनि यो चलचित्र पुगेको विपीन स्मरण गर्छन् । “विश्वले रिकगनाइज गरिसकेको चलचित्रलाई राज्य र हल सञ्चालकले प्राथमिकता दिनुपर्छ भन्ने लाग्छ,” उनी भन्छन्, “भेनिस हरेक चलचित्रकर्मीका लागि एउटा सपना हुन्छ, त्यहाँ पुगेको चलचित्र हो । यसले त झन् आफ्नै बजारमा प्राथमिकता पाउनुपर्ने हो ।”
नेपालबाट ठूलो अन्तर्राष्ट्रिय फिल्म फेस्टिभलमा पुग्ने सिनेमामा प्रायः कुनै न कुनै रूपमा विदेशी चलचित्रकर्मी जोडिएका हुन्छन् । यो सिनेमामा विदेशी जोडिएका छैनन् । “हामी धेरैलाई थाहै छ, इन्टरनेसनल फेस्टिभलमा पुग्ने प्रायः हरेक चलचित्रमा लगानी, सिनेमेटोग्राफर वा अन्य प्राविधिक काममा विदेशी जोडिएका हुन्छन्,” विपीन भन्छन्, “तर, यो सिनेमामा कोही विदेशी जोडिएका छैनन् । हामी नेपाली आफैँले गरेको काम पहिलोपटक भेनिसमा पुगेको छ । यसले प्राथमिकता नै पाउनुपर्ने हो ।”
‘द रेड सुटकेस’मा विपीनसँगै सौगात मल्ल, प्रविण खतिवडा र सृष्टि श्रेष्ठ मुख्य भूमिकामा छन् । रामकृष्ण पोखरेलले निर्माण गरेको सिनेमामा फिडेल देवकोटाको लेखन तथा निर्देशन छ ।
