काठमाडौं । स्टेफन डोहेनीको शतकप्रेरित आयरल्यान्ड वुल्भ्सले अन्तिम एकदिवसीय खेलमा नेपाल ‘ए’ सामु २८५ रनको लक्ष्य प्रस्तुत गरेको छ ।

आइतबार कीर्तिपुरस्थित त्रिवि क्रिकेट मैदानमा टस जितेर ब्याटिङमा आएको आयरल्यान्ड वुल्भ्सले निर्धारित ५० ओभरमा ९ विकेट गुमाएर २८४ रनको योगफल खडा गरेको हो ।

आयरल्यान्डका ओपनर डोहेनीले १०७ रन बनाए । उनले १२९ बलमा आठ चौका र दुई छक्का प्रहार गरे । पेटर मुरले ४४, म्याथ्यु हम्फ्रेसले २३, मोर्गन टोपिङले २१ र फियोन ह्यान्डले २० रन थपे । यस्तै, बेन ह्वाइटले १९ र गाभिन होइले १४ रन जोडे । 

नेपालका रिजन ढकाल र रञ्जित कुमारले समान तीन विकेट लिए । विकाश आग्री र साहब आलमले एक–एक विकेट हात पारे ।

यसअघि घरेलु टिमविरुद्धको पहिलो एकदिवसीय खेलमा वुल्भ्स २१ रनले र दोस्रो खेलमा ११४ पराजित भएको थियो । यसैकारण नेपाल आज जितसहित प्रतियोगिताको सुखद अन्त्य गर्ने लक्ष्यमा छ ।