काठमाडौं । प्रहरी प्रधान कार्यालयले प्रहरी निरीक्षक (इन्स्पेक्टर) मै कारबाही भोगेका पाँच जनालाई प्रहरी नायव उपरीक्षक (डीएसपी)मा बढुवा गरेको छ ।
बुधबार प्रहरीको १९ रिक्त डीएसपीका लागि १९ जना इन्स्पेक्टरलाई बढुवा सिफारिस गरिएको थियो । त्यसमध्ये पाँचजना कारबाही भोगेका इन्स्पेक्टर हुन् ।
व्यावसायिक अधिकृतलाई छुटाएर इन्स्पेक्टरमा कारबाही भोगेकाहरू एक नम्बर र दुई नम्बरमा बढुवा भएका छन् ।
बढुवाको एक नम्बरमा रहेका निर्मल पनेरू कारबाही भोगेका निरीक्षक हुन् । उनी नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीका पीएसओसमेत बसेका थिए ।
त्यस्तै, क्रिषिराम घर्तीमगरसमेत कारबाही भोगेका निरीक्षक हुन् । उनी बढुवाको दोस्रो नम्बरमा छन् ।
प्रहरी निरीक्षक हुँदा पनेरू ४७ नम्बर र घर्ती १० नम्बरमा थिए ।
त्यस्तै, कारबाही भोगेकाहरूमा लक्ष्मण ओली र भीषणबाबु राई छन् । त्यस्तै, प्रहरी निरीक्षकको १४१औँ स्थानका कमल कुमार खड्कासमेत बढुवा हुन सफल भएका छन् ।
उनीहरू सबै २०७० चैतमा प्रहरी निरीक्षकमा भर्ना भएका थिए । ०७० सालको भर्नामा कुल १४४ जना निरीक्षक भर्ना भएका थिए । त्यसमध्ये ४६ जना गएको जेठमा बढुवा भएका थिए । बाँकी ९८ जनामध्येबाट १९ जनालाई बढुवा गरिएको हो ।
त्यो बेला बढुवा गर्दा प्रहरी महानिरीक्षक (आईजीपी)ले कारबाही परेका निरीक्षकको बढुवा नगर्ने मापदण्ड निर्धारण गरेका थिए । तर, यसपालिको बढुवामा भने कारबाही परेका निरीक्षक नै पहिलो र दोस्रो नम्बरमा परेका छन् ।
