काठमाडौं । नेपाल पर्यटन बोर्ड दुई महिनादेखि प्रमुख कार्यकारी अधिकृत (सीईओ) विहीन छ । तत्कालीन सीईओ धनन्जय रेग्मीको कार्यकाल गएको माघ १६ गते सकिएको थियो । त्यसयता बोर्ड नेतृत्वविहीन बनेको हो ।

त्यसअघि माघ २२ गते तीन जना बोर्ड सदस्यको कार्यकाल सकिएको थियो । उपाध्यक्ष चन्द्र रिजाल, सदस्यद्वय कृष्ण साह र निग्मा शेर्पाको कार्यकाल सकिएको थियो । उनीहरूको कार्याकाल सकिएपछि तीन दस्यको पद रिक्त थियो ।

चैत १५ गतेको मन्त्रिपरिषद्ले रिक्त पदमा ऋणराम भण्डारी, राजेन्द्रबहादुर लामा र रामप्रसाद सापकोटालाई नियुक्त गरिसकेको छ ।

सीईओ छनोटका सरकारले लागि चक्र बुढा, मदन आचार्य र मिलन देवकोटा रहेको तीन सदस्यीय समिति गठन गरेको थियो । समितिले सीईओ छनोटका लागि कार्यविधि बनाइसकेको एक सदस्यले जानकारी दिए ।

ती सदस्यका अनुसार कार्यविधिलाई कार्यकारिणी बैठकमा पेस गरिनेछ । कार्यकारिणी समितिले पास गरेपछि कार्यविधि सार्वजनिक गरिने छ ।

“हामी कार्यविधि बनाइसकेका छौँ । त्यो कार्यविधि अब कार्यकारी समितिमा बैठकमा पेस गछौँ । त्यहाँबाट स्वीकृति भएपछि सार्वजनिक गछौँ,” छनोट समितिका एक सदस्यले भने ।

बोर्ड सीईओका लागि आवेदन खुला नहुँदा पनि पूर्व सीईओदेखि पर्यटन व्यवसायीहरूले चासो देखाएको स्रोत बताउँछ । स्रोतका अनुसार पूर्व सीईओहरू दिपक जोसी, प्रवेश अर्याल, हिक्मत सिंह, राजाराम गिरी, ज्ञानेन्द्र राई, कासी भन्दारी, तिलक लामसहितले चासो देखाएका छन् ।

विश्व बजारमा पर्यटन क्षेत्रको प्रमोसन र मार्केटिङ गर्ने उद्देश्यले २५ वर्ष पहिले सार्वजनिक–निजी साझेदारी (पीपीपी) मोडेलमा बोर्डको स्थापना गरिएको थियो ।