काठमाडौं । नेपाली कांग्रेसका महामन्त्री गगन थापाले इलाम–२ मा भेषराज आर्चायलाई उमेदवार नबनाए चुनाव हारिने बताएका छन् ।
मंगलबार देउवा निवास बूढानीलकण्ठमा बसेको बैठकमा महामन्त्री थापाले पार्टी सभापति शेरबहादुर देउवासँग आचार्यलाई जिताउने जिम्मा आफूहरूको बताएका थिए ।
बैठकमा सहभागी एक पदाधिकारीका अनुसार सभापतिले अडान नछाडेपछि थापाले डम्बर खड्कालाई उमेदवार बनाए चुनाव हारिने बताएका थिए ।
"डम्बरलाई दिए चुनाव हार्छ, सभापतिज्यू । दोष तपाईंको थापलामा आउँछ, चुनाव पनि हारिन्छ । भेषराजलाई दिए जिताउने जिम्मा हाम्रो हुन्छ, तपाईंको थापलामा आउँदैन । तर, भेषराजलाई टिकट दिँदा डम्बरको पनि चित्त बुझाएर चुनाव जिताउनुपर्छ । एक भएर चुनाव लड्नुपर्छ," उनको भनाइ उद्धृत गर्दै एक नेताले भने ।
आजको बैठकमा महामन्त्री थापा कडारूपमा प्रस्तुत नभएको भए खड्काले आजै टिकट पाउन सक्ने ती नेता बताउँछन् ।
"यदि गगनजी अलिकति नरम भएको भए डम्बरले टिकट लाने थिए, आजै । उहाँ अन्तिमसम्म रहनुभयो र भेषराजका लागि लड्नुभयो । अरू नेता कुरा राख्दै निस्किए । खास कुरा यो हो," ती नेताले भने ।
आजको बैठकमा सहमति हुन नसकेपछि भोलि फेरि बैठक बस्दै छ ।
