काठमाडौं । गुगलले इन्कग्निटो मोडबाट ट्रयाक गरिएका कैयौँ प्रयोगकर्ताको अरबौँ रेकर्ड एक कानुनी सम्झौताको सर्तअनुसार हटाउने भएको छ । इन्कग्निटो मोडमा प्रयोगकर्ताको विवरण ट्रयाक गर्न सक्ने विषयमा पनि कम्पनीले प्रतिबन्ध लगाउने भएको छ ।
गुगलले सुरक्षित र ब्राउजिङ गतिविधि सेभ नगर्ने भनेको इन्कग्निटो मोडबाटै प्रयोगकर्ताको डाटा संकलन गरेको थियो । प्रयोगकर्ताको गोपनीयतामाथि ‘आक्रमण’पछि गुगलविरुद्ध सन् २०२० मा दायर मुद्दा समाधानका क्रममा यो सम्झौता भएको हो ।
उक्त मुद्दामा पाँच अर्ब डलर क्षतिपूर्ति माग गरिएको थियो । गुगलले सम्झौतालाई समर्थन गरेको छ ।
कम्पनीले अहिले इन्कग्निटो मोडमा थर्ड पार्टी कुकी ब्लक गर्ने भनेको छ । गएको जनवरीमा मुद्दा समाधानका निम्ति दुवै पक्षले काम थालेपछि गुगलले इन्कग्निटो मोडबाट समेत प्रयोगकर्ताको डेटा ट्रयाक हुन सक्ने चेतावनी दिएको थियो । बीबीसीबाट ।
