काठमाडौं । इटालियन सिरी ‘ए’मा लिग लिडर इन्टर मिलानले इम्पोलीमाथि २–० को जित निकालेको छ । सोमबार घरेलु मैदान सान सिरोमा इन्टरलाई जित दिलाउन फेडेरिको डिमार्को र एलेक्सिस सान्चेजले गोल गरे ।

खेलको पाँचौँ मिनेटमा डिमार्कोले गोल गर्दै इन्टरलाई अग्रता दिलाएका थिए । उनले अलेसेन्ड्रो बास्टोनी पासलाई पोस्टको दिशा दिएका हुन् ।

सान्चेनले ८१औँ मिनेटमा गोल गर्दै इन्टरलाई २–० को अग्रतामा राखे । उनले डेन्जेल डम्फ्रिजले उपलब्ध गराएको बललाई जाली चुमाएका थिए । यसपछि थप गोल भएन । इन्टरले तीन अंक निश्चित गर्‍यो ।

जितसँगै तालिकाको शीर्ष स्थानमा आसीन इन्टरले ३० खेलबाट ७९ अंक जोडेको छ । रेलिगेसन क्षेत्रमा संघर्षरत इम्पोली समान खेलबाट २५ अंकसहित १८औँ स्थानमा छ । इम्पोली रेलिगेसन क्षेत्रभन्दा माथि रहेको फ्रोसिनोनभन्दा गोल आधारमा पछाडि छ ।