काठमाडौं । नेपाली सिने उद्योगमा चलचित्र जुध्नु नौलो होइन । स्टार भनिने अभिनेताका सिनेमा एउटै डेटमा ल्याइनु पनि नयाँ होइन । त्यसो त मुख्य भूमिकामा रहेका एकै अभिनेताका सिनेमा एउटै डेटमा रिलिज हुने इन्डस्ट्रीमा फरक–फरकका चलचित्र जुध्नु अनौठो विषय भएन ।

आउँदो वर्ष पनि अपेक्षित र स्टार भनिने अभिनेताकै चलचित्र एउटै मितिमा सार्वजनिक गरिँदै छ । अभिनेता अनमोल केसी र प्रदीप खड्काका सिनेमा एकैदिन रिलिज हुने भएका हुन् ।

अनमोल अभिनीत ‘फर्की फर्की’ र प्रदीपसँगै पल शाह र आर्यन सिक्देल मुख्य भूमिकामा रहेको चलचित्र ‘पुजार सार्की’ जेठ १० गते रिलिज गरिँदै छ । ‘पुजार सार्की’को अफिसियल घोषणा नगरिए पनि निर्माण पक्षले यही मितिमा रिलिजको तयारी गरेको छ ।

“हामीले अफिसियल रूपमा घोषणा गरिसकेका छैनौँ । तर, जेठ १० अगाडि रिलिज गर्न सिनेमा तयार हुँदैन । त्यसपछि वर्षा सिजन सुरु हुन्छ । त्यसपछि तिज र दसैँमा जानुपर्छ,” ‘पुजार सार्की’का निर्देशक दिनेश राउत भन्छन्, “तर, ती मितिमा अरू सिनेमाले नै रिलिज डेट लिइसकेकाले आउने कुरा भएन । त्यसपछि जानलाई निर्माताको ठूलो लगानी कति समय होल्ड गर्ने भन्ने हो ।”

यता, ‘फर्की फर्की’का निर्माता रोहित अधिकारी जेठ १० गते दुई/तीन सिनेमा आउनुपर्ने कारण नरहेको बताउँछन् । आफूले सुरुमै रिलिज डेट लिएको उनको भनाइ छ । “मैले सुरुमै रिलिज डेट लिएको हुँ । जेठ महिना एकैदिन दुई/तीनवटा सिनेमा आउनुपर्ने आकर्षक डेट होइन,” रोहित भन्छन्, “गाजलु पनि मैले जेठमै रिलिज गरेको र यो महिना मलाई राम्रो हुने भएर जेठ १० मा आउने निर्णय छायांकनमा जानुभन्दा पहिला नै गरेको हुँ ।” 

दिनेश भने एकैदिन सिनेमा रिलिज गरिनु हुन्न भन्ने कानुनी बन्देज नरहेको बताउँछन् । यसअघि पनि तीन/चारवटासम्म नेपाली सिनेमा एकैदिन रिलिज हुने गरेकाले यसलाई अन्यथा लिन नहुने उनको जिकिर छ ।

‘फर्की फर्की’को शुभमुहूर्तमै पुगेर दिनेशले रोहितसहितको टिमलाई शुभकमना दिएका थिए । “दुई/तीनवटा सिनेमा एकैदिन रिलिज हुने अनौठो भएन । तर, सिनेमाको व्यापारमा त असर गर्छ,” रोहित भन्छन्, “अरूलाई त असर नगर्ला, निर्मातालाई त असर गर्छ ।”

सिनेमा एउटै मितिमा आएभन्दा पनि किन ल्याइयो भन्ने विषयले अर्थ राख्छ । नेपाली चलचित्र उद्योगमा एउटाको सिनेमा रिलिज तय मितिमा अर्को ल्याएर जुधाउनु समस्या नै हो । सिनेमा त जुध्छ नै, पोस्टर, टिजर र ट्रेलर समेत एकैदिन रिलिज गरिन्छ ।

यसको उदाहरणका रूपमा ‘फर्की फर्की’ र ‘पुजार’ सार्कीलाई नै लिन सकिन्छ । रोहितले सिनेमाका मुख्य कलाकार अनमोलको जन्मदिनको अवसर पारेर फर्स्टलुक पोस्टर सार्वजनिक गरे ।

शनिबार बिहान ‘फर्की फर्की’को पोस्टर रिलिजको केही घण्टापछि नै ‘पुजार सार्की’ निर्माण पक्षले पल शाहको क्यारेक्टर लुक सार्वजनिक ग¥यो ।

एकैदिन त्यो पनि केही समयको अन्तरालमै पोस्टर रिलिज गरिनुलाई दिनेश संयोग मात्र भएको जिकिर गर्छन् । रोहित यसलाई संयोग मात्र मान्न तयार छैनन् । उनी नियत नै खराब रहेको आरोप लगाउँछन् ।

रोहित र दिनेश सँगै सिनेमा बनाउने योजनामा थिए । करिब पाँच वर्षदेखि तयारी गरे पनि काम हुन नसकेपछि उनीहरू चलचित्र निर्माणमा सहकार्य नगर्ने निष्कर्षमा पुगे । ‘२६ करोड’ नामक सिनेमा दिनेशले निर्देशन र रोहितले लगानी गर्ने सहमति थियो ।

कुनै पनि विषयमा विचार फरक परेपछि सँगै काम गर्न नसकिने भन्दै उनी बुझाइ नमिलेकाले रोहितको प्रोजेक्टबाट आफू अलग भएको स्पष्ट पार्छन् ।

नेपाली चलचित्र उद्योगमा ‘इगो’ले सिनेमा जुध्ने गरेको स्वयं मेकरले बताउँदै आएका छन् । केही व्यक्तिको इगोले निर्माता डुबिरहेको सार्वजनिक मञ्चहरूमै मेकरले बताउने गरेका छन् ।

दिनेश इगोका कारण आफ्नो सिनेमा ‘फर्की फर्की’सँग एकैदिन रिलिज हुन लागेको स्वीकार गर्न तयार छैनन् । सिनेमाको रिलिज निर्देशकभन्दा पनि निर्माता र वितरकले आफूअनुकूल गर्ने उनको तर्क छ ।

“सिनेमा रिलिजमा निर्देशकभन्दा पनि निर्माता र वितरकको हात हुन्छ । निर्देशकले त के नै गर्न सक्छ र ?,” दिनेश भन्छन्, “एउटाले अर्कालाई सिध्याउन फलानोले फलानोको सिनेमासँग जुधायो भन्छन्, तर मलाई यो प्रश्न नै होइन भन्ने लाग्छ ।”

सिनेमा आर्ट अर्थात् कला भएकाले कसैले कसैलाई सिध्याउन नसक्ने उनको टिप्पणी छ । त्यसैले यो आरोप मात्र भएको उनी बताउँछन् । “आर्ट हो । कसैले चाहेर कसैलाई सिध्याउने भन्ने हुँदैन । कोही सकिन्छ भने ऊ आफ्नै कारणले सकिने हो,” दिनेश भन्छन्, “म सकिन्छु भने अरूका कारण होइन, मेरै कारणले सकिन्छु । कसैले चाहँदैमा म सकिन्नँ ।”

रोहित भने सिनेमा कलासँगै व्यापार पनि भएको तथ्यलाई बिर्सन नहुनेमा जोड दिन्छन् । चलचित्र कलाको व्यापार भएको उनी बताउँछन् । उनी भन्छन्, “अहिलेको समयमा सिनेमा शुद्ध कला मात्रै हो भनेर कसैले भन्छ भने त्यो आदर्श मात्रै हो । लगानी गर्ने निर्माताका लागि सिनेमा कलासँगै व्यापार पनि हो ।”

एउटै मितिमा दुई सिनेमा ल्याइँदा केही न केही नकारात्मक असर गर्ने तथ्यलाई नजरअन्दाज गर्न नहुने उनको धारणा छ । “२० करोड कलेक्सन हुने सिनेमाले १० करोड मात्रै गर्ला, १० करोड कलेक्सन हुन्थ्यो भने पाँच करोड मात्रै हुन्छ होला,” रोहित भन्छन्, “करोडौँ लगानी गर्नेलाई त समस्या हुन्छ नै । यहाँ कुरा जेठ १० को मात्रै होइन, नेपाली सिने उद्योगमा रहेको इगो साँधेर बस्ने खराब प्रवृत्तिको हो ।”

गत वर्ष अनमोल अभिनीत ‘छड्के–२’ र दीपकराज गिरी समूहको ‘छक्का पञ्जा’ एकैदिन रिलिज गरिएको थियो । ‘छड्के–२’ ले ३० लाख रुपैयाँ पनि कलेक्सन गर्न सकेको थिएन ।