काठमाडौं । नाटकीय अन्तिम ओभरमा खेल आफ्नो पक्षमा पार्दै नेपालले आयरल्यान्ड वुल्भ्सविरुद्धको अन्तिम ट्वान्टी–२० खेलमा तीन रनको साँधुरो जित निकालेको छ ।

सोमबार कीर्तिपुरस्थित त्रिवि क्रिकेट मैदानमा सम्पन्न खेलमा नेपालले प्रस्तुत गरेको २१४ रनको लक्ष्य पछ्याउने क्रममा वुल्भ्सले निर्धारित २० ओभरमा सात विकेट गुमाएर २१० रनमात्र बनाउन सक्यो । नेपालको यो जितसँगै तीन खेलको ट्वान्टी–२० शृंखला आयरल्यान्ड वुल्भ्सले २–१ ले आफ्नो पक्षमा पारेको छ ।

अन्तिम ओभरमा वुल्भ्सलाई जितका लागि २० रन आवश्यक थियो । नेपालबाट बलिङमा आएका राशिद खानलाई वुल्भ्सका फियोन ह्यान्डले छक्का प्रहार गरे । दोस्रो बलमा ह्यान्डले दुई रन लिए । तेस्रो बलमा पनि ह्यान्डले दुई रन नै लिए । चौथो बलमा ह्यान्डले चौका प्रहार गरेपछि वुल्भ्सलाई जितका निम्ति दुई बलमा ६ रनमात्रै आवश्यक बनेको थियो । 

पाँचौँ बलमा ह्यान्ड दुई रनका लागि दौडिए पनि आरिफको ‘थ्रो’ मा विकेटकिपर विनोद भण्डारीबाट रनआउट भए । जितका लागि अन्तिम बलमा पाँच रन आवश्यक हुँदा क्रिजमा नयाँ आएका लियम म्याकार्थीले एक रनमात्र लिएपछि नेपाल तीन रनले विजयी भएको हो । अन्तिम बल ‘फुट टस’ भएकाले वुल्भ्सका खेलाडीले ‘नो बल’को माग गरे पनि अम्पायर अधिप प्रधान र बासु कर्णले उक्त मागलाई खारेज गरिदिएका थिए । 

आयरल्यान्डका ग्यारेथ डेलानीले ६८ रन बनाए पनि टिमको हार टार्न सकेनन् । ५२–४ को नाजुक अवस्थाबाट डेलानीले मोर्गन टोपिङसँग १२९ रनको शतकीय साझेदारी गर्दै वुल्भ्सको इनिङ सम्हालेका थिए । टोपिङले ३७ बलमा चार चौका र चार छक्कासहित ६० रन जोडे । यसबाहेक, ओपनर रस अडायरले ३१ रन बनाउँदा फियोन ह्यान्डले २२ रन थपे । 

नेपालका विपीन खत्रीले तीन विकेट लिए । चार ओभर बलिङ गरेका विपीनले एक मेडन राख्दै २३ रन खर्चिए । कमलसिंह ऐरी, नारायण जोशी र राशिदले समान एक विकेट हात पारे । त्यसअघि आरिफ सेखको आक्रामक ब्याटिङमा टस हारेर ब्याटिङमा आएको नेपालले निर्धारित २० ओभरमा सात विकेट गुमाएर २१३ रनको योगफल खडा गरेको थियो । नेपालबाट आक्रामक रूपमा प्रस्तुत भएका आरिफले अविजित ९३ रन बनाए । उनले ४८ बलमा सात चौका र ६ छक्का प्रहार गरे । 

आरिफले ३३–३ को स्थितिबाट बसिर अहमेदसँग चौथो विकेटका लागि ४७ रनको साझेदारी गर्दै नेपालको इनिङ उकासे । बसिरले स्कोरबोर्डमा १९ रन थपे । नवौँ नम्बरमा ब्याटिङमा लागि आएका कमलसिंह ऐरीले आरिफसँग अन्तिममा आठौँ विकेटका लागि ४६ रनको साझेदारी गरेपछि नेपालले २०० रनको आँकडा पार गरेको हो । 

आरिफसँगै अविजित रहेका कमलले सात बलमा दुई चौका र एक छक्कासहित १९ रन जोडे । यसबाहेक, राशिदले २४, पवन सर्राफले १३, र कप्तान विनोद भण्डारीले ११ रन बनाए । 

आयरल्यान्डका फियोन ह्यान्डले दुई विकेट लिए । गाभिन होइ, म्याथ्यु फोस्टर, ग्यारेथ डेलानी र लियन म्याकार्थीले समान एक विकेट लिए । 

यसअघिका दुई खेलमा घरेलु टिमविरुद्ध जित निकालेको वुल्भ्सले शृंखलाको उपाधि अन्तिम खेलअगावै जितिसकेको थियो । यसअघि वुल्भ्सले नेपाल ‘ए’लाई पहिलो खेलमा २१ र दोस्रो खेलमा ४० रनले हराएको थियो । अब यी दुई टिमले तीन खेलको एकदिवसीय शृंखलामा प्रतिस्पर्धा गर्नेछन् । एकदिवसीय शृंखला बुधबारदेखि सुरु हुनेछ । एकदिवसीय शृंखलाको दोस्रो खेल शुक्रबार र तेस्रो आइतबार हुनेछ ।