काठमाडौं । नेपाली राष्ट्रिय क्रिकेट टिमका कप्तान रोहितकुमार पौडेलले सरकारले घोषणा गरेको पुरस्कार अझै पूरा नपाएको भन्दै गुनासो गरेका छन् ।

भारतका दुई राज्य टिमसँगको फ्रेन्डसिप कप खेल्न जाने टोलीको बिदाइ कार्यक्रममा बिहीबार उनले युवा तथा खेलकुदमन्त्री विराजभक्त श्रेष्ठसामु आफूहरूले सरकारबाट घोषित पुरस्कार अझै पूरा पाइनसकेको बताएका हुन् ।

“एउटा अनुरोध छ । सरकारले हामीलाई पुरस्कार तोकेको थियो, तर हामीले अझै पनि ५०–६० प्रतिशतभन्दा धेरै पाएका छैनौँ, खेलकुदमन्त्रीले यसमा हेर्नुहुनेछ भन्ने विश्वास छ मलाई,” कप्तान रोहितले भने, “हामी तयार छौँ अहिले । भर्खरै हामीले आयरल्यान्ड ‘ए’सँग पनि गेम खेल्यौँ । एसीसी प्रिमियर कपअघि हामी भारतमा खेल्दै छौँ । उहाँहरूको टिम एकदम बलियो छ । एसीसी प्रिमियर कपको महत्त्व हामीलाई थाहा छ । यो अवसरलाई सम्मान गरेर खेल्नेछौँ । हामी पूरा टिमलाई त्यहाँबाट ठूलो नतिजा लिएर आउँछौँ भन्ने विश्वास छ ।”

भारतमा नेपालले गुजरात र बरोडासँग त्रिकोणात्मक ट्वान्टी–२० शृंखला खेल्नेछ । तालिकाअनुसार, नेपालले बरोडा र गुजरातका टिमसँग मार्च ३१ देखि अप्रिल ७ सम्म शृंखला खेल्नेछ । नेपालले मार्च ३१ मा गुजरातसँग खेल्दै शृंखलाको सुरुआत गर्नेछ ।

नेपालले अप्रिल २ मा बरोडासँग, अप्रिल ३ मा गुजरातसँग र अप्रिल ५ मा पुनः बरोडासँग खेल्नेछ ।

शृंखलाका शीर्ष दुई टिम उपाधिका निम्ति अप्रिल ७ मा भिड्नेछन् । शृंखलाका सबै खेल भारतका वापीमा हुनेछ । भारत भ्रमणअघि नेपालले घरेलु मैदानमा आयरल्यान्ड वुल्भ्सँग दुई ट्वान्टी–२० क्रिकेट खेलेको थियो ।