काठमाडौं । पूर्वउपराष्ट्रपति नन्दबहादुर पुन ‘पासाङ’ का छोरा दिपेश पुन एक सातादेखि प्रहरी हिरासतमा छन् । माओवादी निकट अखिल क्रान्तिकारीका महासचिवसमेत रहेका पुन बुटवलस्थित सुप्रिम बचत तथा ऋण सहकारी संस्था लिमिटेडको रकम ठगी प्रकरणमा पक्राउ परेका हुन् ।

काठमाडौंबाट २ चैतमा पक्राउ परेका पुनलाई इलाका प्रहरी कार्यालय बुटबलमा राखिएको छ ।  सुप्रिम सहकारीका सचिव रहेका पुनसहित सञ्चालक समितिले बचतकर्ताको रकम हिनामिना गरेको खुलेपछि उनी पक्राउ परेका हुन् ।

२०७२ देखि सञ्चालनमा आएको सुप्रिम सहकारीको सञ्चालक समितिको अध्यक्षमा त्यतिबेला ग्यालेक्सी टेलिभिजनका सञ्चालकसमेत रहेका ओखलढुंगाका गितेन्द्रबाबु राई (जीबी) थिए । त्यतिबेला दिपेश सहकारीको कोषाध्यक्ष थिए ।

सहकारी दर्ता गर्दा उपाध्यक्ष ओमप्रकाश गुरुङ, सचिव राजु बराल थिए ।  जीबी राईबाहेक सहकारी ठगी प्रकरणमा जोडिएका दुर्गा चापागाईं पाण्डेय, ओमप्रकाश गुरुङ पक्राउ परिसकेका छन् । प्रहरीको अनुसन्धानअनुसार सहकारीको ११ हजार बचतकर्ताको एक अर्ब ७ करोड ८२ लाख ६७ हजार ७२९ रुपैयाँ हिनामिना भएको देखाएको छ ।

उक्त रकममध्ये एक अर्ब २ करोड रुपैयाँ लगानी भएको खुलेको छ । त्यसमध्ये ७८ करोड रुपैयाँ जिबी राईमार्फत पाँच वटा कम्पनीमा पुगेको खुलेको प्रहरीको अनुसन्धानले देखाएको छ । जीबी राईले गोर्खा मिडिया ग्रुपअन्र्तगतको ग्यालेक्सी टेलिभिजनमा सहकारीको रकम लगानी गरेको खुलेको हो ।

एक वर्षअघि राजीनामा दिएका थिए पुनले

प्रहरीको अनुसन्धानबाट दिपेश पुनले एक वर्षअघिमात्रै सहकारीको कोषाध्यक्षबाट राजीनामा दिएको खुलेको छ ।

सहकारीको सुरुवाती चरणमा कोषाध्यक्ष रहेका पुन पछि सचिव समेत भएको कागजातबाट खुलेको छ ।  जीबी राईले भने २०७६ मा सुप्रिमको अध्यक्षमा ओमप्रकाश गुरुङलाई बनाएका थिए । ओमप्रकाश अध्यक्ष हुँदा भैरहवाको जयअम्बे बहुउद्देश्यीय सहकारी संस्था लिमिटेडलाई समेत सुप्रिमसँग मर्ज गरे ।

छोटो समयमै सहकारीले रुपन्देही जिल्लाभरि विस्तार गरेर उनीहरुले सवाअर्ब रुपैयाँ संकलन गरेका थिए । तर, पछि उनीहरुले बचतकर्ताको रकम फिर्ता गर्न नसकेपछि सुप्रिम सहकारीविरुद्ध पीडितले उजुरी दिन थालेका थिए ।

दिपेश पुन र सहकारीका अर्का कोषाध्यक्ष सुरज श्रेष्ठले २०७९ मंसिर २४ मा राजीनामा दिएको खुलेको छ ।  तर रकम अपचलनपछि मात्रै उनीहरुले राजीनामा दिएको खुलेपछि प्रहरीले दिपेश पुनलाई पक्राउ गरेको हो ।

पुन ऋण प्रवाह गर्दा सञ्चालक समितिमा रहेको खुलेपछि उनी पक्राउ परेको प्रहरीले जनाएको छ । इलाका प्रहरी कार्यालय बुटबलका प्रमुख डीएसपी विजय पण्डितले अनुसन्धान अझै जारी भएकाले रकम हिनामिना प्रकरण खुल्न सक्ने बताए ।

पक्राउ परेकामाथि थप अनुसन्धान जारी छ । उनीविरुद्ध प्रहरीले सहकारी ठगी मुद्दामा अनुसन्धान गरिरहेको रुपन्देही प्रहरीका डीएसपी मनोहर भट्टले जानकारी दिए ।

फागुन ३ बाट पक्राउ गरेर अनुसन्धान थालेको प्रहरीले उनीहरुलाई ६० दिनसम्म थुनामा राखेर अनुसन्धान गर्न मिल्ले कानुनी प्रावधान छ ।  सुप्रिम सहकारी प्रकरणमा संलग्न राजु बराल, सुरज श्रेष्ठ, देवेन्द्रबाबु राई र भुपेन्द्र राई फरार अझै छन् ।

उनीहरुमाथ थप अनुसन्धान जारी छ । सहकारीका व्यवस्थापक राजु केसीसमेत फरार छन् । हालसम्म विजयकुमार नेपालसहित एक हजार ७३० जनाले ठगीको जाहेरी प्रहरीमा दिएका छन् ।

पोखराको सूर्यदर्शन सहकारी ठगी प्रकरणमा पक्राउ परेका भविश्वर अर्याल र कुमार रम्तेललाई समेत बुटबल प्रहरीले कास्कीबाट बुटबल ल्याएर अनुसन्धान जारी राखेको छ ।  सहकारी स्थापना गरी ठगी धन्दा चलाएका मुख्य योजनाकार जीबी राई भने अझै पक्राउ परेका छैनन् ।

उनी मलेसिया भागेको खुलेको छ । उनीविरुद्ध प्रहरीको अन्तर्राष्ट्रिय अपराध संगठनले रेड नोटिस जारी गरिसकेको छ । तर, अझै नेपाल झिकाउन भने प्रहरीले सकेको छैन । राजनीतिमा प्रवेश गर्नुअघि गृहमन्त्री रवि लामिछाने जीबी राईकै मिडिया ग्यालेक्सी टीभीका प्रबन्ध निर्देशक थिए । 

जीबीले सञ्चालन गरेको ग्यालेक्सी टीभीमा रवि लामिछानेले समेत सेयर लिएर काम गरेका थिए । टीभीकै निम्ति सुप्रिम सहकारीबाट लामिछानेले समेत ‘पुलेसो ऋण’ लिएका थिए । लामिछाने गृहमन्त्री भएपछि पनि राई किन पक्राउ नपरेको भन्दै बचतकर्ताले प्रश्न गरेका छन् ।

पोखराका सूर्यदर्र्शन सहकारीका पीडितले गृहमन्त्री लामिछानेमाथिसमेत अनुसन्धान हुनुपर्ने माग राख्दै आएका छन् ।  संसद्मा प्रमुख प्रतिपक्षी दल नेपाली कांग्रेसले समेत गृहमन्त्रीको राजीनामालाई एजेन्डा बनाएको छ ।