काठमाडौं । विश्वकै धनाढ्य एलन मस्कको कम्पनी न्युरालिंकले मानव मस्तिष्कमा राखेको चिपका क्षेत्रमा नयाँ सफलता पाएको छ । चिप प्रत्यारोपण गरिएका व्यक्ति दिमागी बलकै भरमा कम्प्युटरको कर्सर नियन्त्रण गर्न सफल भएका हुन् ।

मस्कले उनकै सामाजिक सञ्जाल एक्समा न्युरालिंकले हालेको एक भिडियो रिपोस्ट गरेका छन् । भिडियोमा दिमागमा चिप राखिएका व्यक्तिले सोचेकै भरमा चेस खेल खेलिरहेको देख्न सकिन्छ । 

पक्षाघात भएका ती व्यक्ति २९ वर्षीय नोल्यान्ड अर्बाग हुन् । उनले मस्तिष्कमा राखिएको चिपको मद्दतले सोचेअनुसार चेस खेलिरहेको भिडियोमा देखिन्छ ।

ह्विलचेयरमा बसेर खेलिरहेकै क्रममा ती व्यक्तिले भनेका छन्, “स्क्रिनमा त्यो कर्सर देख्नुभयो ? त्यो म हुँ... यो सबै दिमागको शक्ति हो ।”

ती व्यक्तिले आठ वर्षअघि एक दुर्घटनामा परी काँधबाट पक्षघात भएको बताएका छन् । न्युरालिंकले गर्न खोजेको मानव मस्तिष्क र कम्प्युटरबीचको अन्तर्क्रियाका क्षेत्रमा यसलाई महत्त्वपूर्ण सफलताका रूपमा हेरिएको छ ।