काठमाडौं । पछिल्लो २० वर्षयता अन्तर्राष्ट्रिय फुटबलमा जितविहीन रहेको सान मारिनोले बुधबार जितको सुनौलो अवसर गुमाएको छ । पछिल्लो दुई दशकयता जितविमुख रहेको सान मारिनोले बुधबार घरेलु मैदानमा क्यारेबियन राष्ट्र सेन्ट किट्स एन्ड नेभिसलाई अन्तर्राष्ट्रिय मैत्रीपूर्ण फुटबलमा आतिथ्यता प्रदान गरेको थियो । 

पाहुना टिमविरुद्ध १–० को अग्रता बनाए पनि त्यसलाई कायम राख्न नसक्दा सान मारिनो राष्ट्रको इतिहासमा दोस्रो जित निकाल्नबाट चुकेको हो । खेल सेन्ट किट्स एन्ड नेभिसले ३–१ ले आफ्नो पक्षमा पार्‍यो ।

खेलको २१औँ मिनेटमा फिलिप्पो बेरार्डीले पेनाल्टीमा गोल गर्दै सान मारिनोलाई अग्रतामा राखेका थिए । तर, घरेलु टिमको यो अग्रता लामो समय टिक्न भने सकेन । सेन्ट किट्सका टाइक्विन टेलेलले ३१औँ मिनेटमा बराबरी गोल फर्काएका थिए । 

यस्तै, ४५औँ मिनेटमा एन्ड्रे बर्लीले गोल गरेपछि पाहुना टिमले पहिलो हाफमा २–१ को अग्रता बनाएको थियो । ४९औँ मिनेटमा पाहुना टिमका ह्यारी पानायीटोउले गोल गरेपछि सान मारिनो ३–१ ले निराश बन्यो । सेन्ट किट्स एन्ड नेभिस दुई अन्तर्राष्ट्रिय मैत्रीपूर्ण फुटबलका लागि सान मारिनोमा छ । यी दुईबीचको दोस्रो खेल आउँदो सोमबार हुनेछ ।