काठमाडौं । जनता समाजवादी पार्टी (जसपा)का सांसद प्रदीप यादवले भन्सार हुकुमी शैलीमा चलिरहेको बताएका छन् । मंगलबार प्रतिनिधिसभा बैठकमा भन्सार विधेयकमाथिको छलफलका क्रममा उनले यस्तो बताएका हुन् ।
उनले अन्तःशुल्कमा लगाइएको ‘पेनाल्टी’ हटाउन समेत माग गरे । उनले पेनाल्टी लगाउने सरकारको नीतिले अवैध कारोबार हुन्डीलाई प्रोत्साहन गरेको जिकिर गरे ।
“किनभने, आयातकर्ताले भन्सारको मूल्यपुस्तिका कम मूल्यको बिलबीजक पेस गरेमा ५० प्रतिशत पेनाल्टी तोक्छ । आव २०८०/०८१ को बजेटमा अन्तःशुल्कमा समेत पेनाल्टी लिने प्रावधान राखिएको छ । पेनाल्टी तोकाउनको लागि आयातकर्ताहरूले भन्सार किताबभन्दा बढीको बिल पेस गर्छन् र सोहीअनुसार एलसी पनि खोल्छन्,” उनले भने, “जसले गर्दा नेपाली भन्सारमा पेनाल्टी लाग्दैन । अर्काेतर्फ, बिलबीजकको वास्तविक मूल्यभन्दा बढी पठाएको रकम हुन्डीको माध्यमबाट नेपाल फर्किन्छ । तसर्थ, भन्सार मूल्यांकन किताबमा लगाएको अन्तःशुल्कमा पेनाल्टीले गर्दा अवैध कारोबारलाई प्रोत्साहन गरेको देखिन्छ । यसकारण पेनाल्टी लिने प्रावधान हटाउन जरुरत छ ।”
कच्चापदार्थमा भन्दा तयारी वस्तुको भन्सार शुल्क सस्तो हुँदा स्वदेशी उद्योग मारमा परेको उनको भनाइ थियो ।
