काठमाडौं । रुसमा राष्ट्रपतीय निर्वाचनको मतदान सुरु भएको छ । रुसी मतदाताले स्थानीय समयानुसार शुक्रबार बिहान ८ बजेदेखि कामचटका, चुकोटका र अरू क्षेत्रमा सन् २०२४ को राष्ट्रपतीय निर्वाचनअन्तर्गत मतदान गर्न सुरु गरेका हुन् ।

शीर्ष पदका लागि चार उमेदवारले प्रतिस्पर्धा गर्दै छन् । लिबरल डेमोक्रेटिक पार्टीका लियोनिद स्लुत्स्की, रुसी कम्युनिस्ट पार्टीका निकोलाई खारिटोनोभ, न्यु पिपुल पार्टीका भ्लादिस्लाव दाभान्कोभ र वर्तमान राष्ट्रपति एवं स्वतन्त्र उमेदवार भ्लादिमिर पुटिन प्रतिस्पर्धामा छन् ।

मतदानका निम्ति ९० हजारभन्दा बढी मतदान केन्द्र स्थापना गरिएको छ । सुदूरपूर्व क्षेत्रमा अवस्थित कामचटका र चुकोटका मतदान थालिएको पहिलो क्षेत्र हुन् ।

रुसको पश्चिमी छेउमा अवस्थित कालिनिनग्रादका मतदान केन्द्रहरू मतदान सुरु गर्ने अन्तिम क्षेत्र हुनेछन् । रुसी केन्द्रीय निर्वाचन आयोगले जारी गरेको तथ्यांकानुसार, विदेशमा बस्ने १८ लाखभन्दा बढीसहित करिब ११ करोड रुसी नागरिक मतदान गर्न योग्य छन् ।

रुसको राष्ट्रपति निर्वाचन नियमावलीअनुसार, ५० प्रतिशतभन्दा बढी मत प्राप्त गर्ने उमेदवार विजयी हुनेछन् । दुईभन्दा बढी र कसैको पनि ५० प्रतिशत मत नपुगेको अवस्थामा केन्द्रीय निर्वाचन आयोगले शीर्ष दुई उमेदवारका निम्ति दोस्रो चरणको मतदान घोषणा गर्नेछ । दोस्रो चरणमा सबैभन्दा बढी मत ल्याउने उमेदवार राष्ट्रपतिमा निर्वाचित हुनेछन् । सिन्ह्वा/न्युज एजेन्सी नेपाल