काठमाडौं । राष्ट्रियसभामा नेकपा (एमाले) संसदीय दलका नेता देवेन्द्र दाहालले राजनीतिक स्थिरता खोज्नुपर्ने आवश्यकता रहेको बताएका छन् । बुधबार राष्ट्रियसभा बैठकमा उनले यस्तो बताएका हुन् ।

सधैँ राजनीतिक अस्थिरता हुने गरेको भन्दै उनले स्थिरताका निम्ति के गर्न सक्छौँ भन्ने विषयमा राष्ट्रियसभाबाट काम गर्नुपर्नेमा जोड दिए । “...सधैँभरि राजनीतिक अस्थिरता हुने र राजनीतिक स्थिरताका लागि के गर्न सक्छौँ, कस्ता कामहरू गर्न सक्छौँ भन्ने सन्दर्भमा हामीले महत्त्वपूर्ण भूमिका खेल्न सक्नुपर्छ,” उनले भने ।

रुसी सेनामा भर्ती भएका नेपालीलाई फर्काउने बारेमा पनि सरकारले गम्भीर भएर सोच्न जरुरी रहेको उनले उल्लेख गरे । उनले बेरोजगारीका कारण युवा विदेश पलायन भइरहेको बताए ।

दाहालले संघीयतासम्बन्धी कानुन कार्यान्वयन गर्न प्राथमिकता दिनुपर्नेमा पनि जोड दिए । न्युज एजेन्सी नेपाल