काठमाडौं । धरान उपमहानगरपालिकाका मेयर हर्क साम्पाङले आगामी वर्षको नगरपालिकाको बजेटमा नेपाली चलचित्र क्षेत्रका लागि बजेट छुट्याउने बताएका छन् । धरानमा गरिएको ‘महाजात्रासँग स्थानीय सरकार : सिनेमा संवाद’कार्यक्रममा मेयर साम्पाङले आगामी वर्षको नगरपालिकाको बजेटमा नेपाली चलचित्र क्षेत्रलाई कुनै न कुनै रूपमा बजेटमार्फत् नै सम्बोधन गर्ने प्रतिबद्धता जनाएका हुन् ।

नेपाली चलचित्रसँगै कला, संस्कृतिसँग आफू नजिक रहेको बताउँदै उनले भने, “नेपाली फिल्मलाई सम्बोधन गरेर म बजेट ल्याउँछु । धरानले फिल्मलाई हेर्यो भन्ने आभाष दिलाउने छु ।” 

उनले धरानमा चलचित्र छायांकनका लागि सहज हुने गरी आफूले चाँडै नै सुटिङका स्थलहरू समावेश गरेर डायरी सार्वजनिक गर्ने प्रतिबद्धता जनाए । 

कलाकारलाई मोबाइलमार्फत् मात्रै माया गरेर नहुने भन्दै उनले भने, “कलाकारलाई माया गर्ने हो भने हलसम्म पुग्नुपर्छ । त्यसैले नेपाली फिल्म हलमै हेर्ने गरौँ ।” 

संवाद कार्यक्रममा अभिनेता हरिवंश आचार्यले धरानमा फिल्म ‘बलिदान’को छायांकन गरेको स्मरण गर्दै छायांकनको गन्तव्यका रूपमा व्याख्या गरे । उनले धरानमा सिनेमाका गतिविधि बढाउनुपर्ने बताए । 

फिल्म ‘महाजात्रा’का कार्यकारी निर्माता रवीन्द्र सिंह बानियाले स्थानीय सरकारसँग आफूहरूले ठूलो सहयोगभन्दा पनि हातेमालोको अपेक्षा गरेको बताए । सिनेमाको छायांकनका लागि आउँदा लोकेशनदेखि थुप्रै कुराहरूमा अन्योल हुने भन्दै त्यसमा स्थानीय सरकारले सहजीकरण गरिदिनुपर्नेमा उनको जोड छ ।