काठमाडौं । नेपाली कांग्रेसले कोसीमा माओवादी उमेदवारले राष्ट्रियसभा निर्वाचन हार्दा कांग्रेसलाई चित्त दुखेर महासमितिको डकुमेन्टमा लेख्ने हिम्मत राखेको बताएको छ । तर, रोल्पामा माओवादीले आफ्नो उमेदवार जिताउन गठबन्धन भए पनि कांग्रेसको प्रदेश सभापतिलाई चुनाव हराएको बिर्सिएको भन्दै प्रश्न उठाएको छ । 

बुधबार प्रतिनिधिसभाको बैठकमा रोस्टममा उभिएर बोल्दै कांग्रेस महामन्त्री विश्वप्रकाश शर्माले सो कुरा बताएका हुन् ।

“कोसीमा चित्त दुखेको कुरा स्वीकार गर्छौँ । कोसीमा जे भयो त्यसलाई ढाकछोप गरेर जाने हैन खुला संवादबाट समाधान गरेर जान चाहन्छौँ, महासमिति डकुमेन्टमा लेख्यौँ । हामीले आफू पराजित भएको अनुभूति गर्यौँ,” उनले भने, “तर, रोल्पामा संघमा माओवादी पार्टीको मित्र यहाँ मन्त्री भएर मुस्कुराएर बस्दै गर्दा नेपाली कांग्रेसका प्रदेश कार्यसमितिको सभापति अमरसिंह पुन पराजित भए । अनि माओवादीका साथीहरू लाइन लागेर धारामा भोट हालेर जितेको कथा तपाईंको डकुमेन्टमा कही उल्लेख छ ?”

उनले कांग्रेसले आफ्नो डकुमेन्ट लेख्न प्रधानमन्त्री र कम्युनिष्ट पार्टीलाई नसोध्ने बताए ।