काठमडौं । इंग्लिस प्रिमियर लिगमा न्युक्यासल युनाइटेडविरुद्ध चेल्सीले ३–२ को रोमाञ्चक जित निकालेको छ । सोमबार घरेलु मैदान स्टाम्फोर्ड ब्रिजमा चेल्सीलाई जित दिलाउन निकोलस ज्याक्सन, कोल पाल्मेर र मिखाइलो मुन्द्रियकले गोल गरे । न्युक्यासलका एलेसान्डर इसाक र जाकोब मर्फीले गोल गरे पनि हार टार्न सकेनन् । 

घरेलु समर्थकमाझ ज्याक्सनले गोल गर्दै चेल्सीलाई अग्रतामा राखेका थिए । तर, ४३औँ मिनेटमा इसाकले गोल गर्दै न्युक्यासललाई खेलमा फर्काए । ५७औँ मिनेटमा पाल्मेरको गोलमा चेल्सीले पुनः २–१ को अग्रता बनायो । ७६औँ मिनेटमा मुन्द्रियकले गोल गर्दै चेल्सीलाई ३–१ को अग्रतामा राखेका थिए । 

९०औँ मिनेटमा मर्फीले गोल गर्दै न्युक्यासललाई खेलमा फर्काउने प्रयास गरे पनि टिमको हार टार्न सकेनन् । 

जितसँगै २७ खेलबाट ३९ अंक जोडेको चेल्सी तालिकाको ११औँ स्थानमा छ । चेल्सीभन्दा एक खेल धेरै खेलेको न्युक्यासल ४० अंकसहित तालिकाको १०औँ स्थानमा छ ।