काठमाडौं । गायक/गायिकाहरूको संस्था प्रस्तोता समाज एलिना चौहानको पक्षमा उभिएको छ ।

गायक/गायिका एवम् प्रस्तोताहरूको संगठन प्रस्तोता समाजले चौहानलाई फागुन २० गते पर्वतमा आयोजित मगर महोत्सव २०८० मा आफ्नो प्रस्तुति राख्ने क्रममा साउन्ड टेक्निसियनबाट भएको दुर्व्यवहारप्रति गम्भीर ध्यानाकर्षण भएको जनाएको छ । 

एलिनाले आपसी सद्भाव नखल्वलियोस भनेर सौहार्दतापूर्वक आफ्ना कमिकमजोरीहरूलाई मनन् गर्दै सामाजिक सञ्जालमार्फत् आत्मआलोचना गरिसकेको पनि समाजले जनाएको छ । 

“साउन्ड व्यवसायिहरूको तर्फबाट भएका आफ्ना कमिकमजोरीलाई मध्यनजर नगर एकतर्फी रुपमा गायिका चौहान उपस्थित हुने कार्यक्रममा साउन्ड सिस्टम उपलब्ध नगराउने व्यहोराका असान्दर्भिक एवम् बहिस्कारजस्ता अमर्यादित किसिमका कृयाकलाप भइरहेको छ । आगामी दिनमा यस्ता कृयाकलाप अझ मौलाउने अवस्था देखिएकोले साउन्ड सिस्टम व्यवसायीले उक्त विज्ञप्ति अविलम्ब फिर्ता गरि आगामी दिनमा समन्वयात्मक मार्गवाट अगाडि बढ्न अनुरोध गरिन्छ,” समाजले विज्ञप्ति जारी गर्दै भनेको छ । 

यस्तो थियो एलिना र साउन्ड टेक्निसियनबीचको विवादको कारण 

राष्ट्रिय लोक तथा दोहोरीगीत प्रतिष्ठान नेपाल, राष्ट्रिय संगीतकर्मी संघलगायतले यसअघि नै साउन्ड सिस्टम व्यवसायीलाई आफ्नो विज्ञप्ति फिर्ता लिन माग गर्दै एलिनाका पक्षमा उभिसकेका छन् । यी संस्थाले विज्ञप्ति नै जारी गर्दै साउन्ड सिस्टम व्यवसायीको निर्णयप्रति आपत्ति जनाइसकेका छन् ।