काठमाडौं । सत्तारूढ प्रमुख घटक नेकपा (एमाले)का वरिष्ठ उपाध्यक्ष ईश्वर पोखरेलले नयाँ सत्तासमीकरणले पार्टी सिध्याउने अभियान टुटेको जिकिर गरेका छन् ।

देशभित्र र बाहिरका केही शक्तिले एमाले सिध्याउने प्रयोजनका निम्ति बनाएको नेपाली कांग्रेस नेतृत्वको आपराधिक गठबन्धन टुटाएर नयाँ समीकरण बनाउन आफूहरू सफल उनको भनाइ छ ।

“...चुनावभन्दा अगाडि सिद्धान्तविपरीत, कार्यक्रमविपरीत, योजनाविपरीत गठबन्धन खडा भयो,” उनले भने, “त्यो गठबन्धनले एमालेलाई सिध्याउने योजना बनायो । बाहिरका शक्तिहरू पनि लागे, भित्रका पनि लागे ।”

शनिबार काठमाडौंमा आयोजित एक कार्यक्रममा उनले नयाँ सत्तासमीकरणलाई ‘मिसन–२०८४’ पूरा गर्न सहयोगीका रूपमा प्रयोग गर्ने योजना समेत सार्वजनिक गरे । मिसन–२०८४ अभियानलाई सहयोग गर्न सरकार र सत्ता गठबन्धनलाई पनि उपयोगमा ल्याउने पार्टीको योजना रहेको उनले सुनाए ।

मुलुकको बेथितितर्फ गइरहेको राजनीतिलाई नयाँ सत्तासमीकरणमार्फत सही दिशामा ल्याउन सक्दो कोसिस गर्ने उनले प्रतिबद्धता व्यक्त गरे । “...मिसन २०८४ जारी रहन्छ । मिसन २०८४, एमालेले बहुमत ल्याउने जुन योजना हो, त्यो योजना हाम्रो जारी रहन्छ । मुलुकको राजनीतिलाई सकारात्मक दिशामा अघि बढाउने हाम्रो कोसिस जारी रहन्छ । हो त्यहीअन्तर्गत यो चिज भएको हो ।”

वरिष्ठ उपाध्यक्ष पोखरेलले मुलुकलाई सही बाटोमा अघि बढाउन भ्रष्टाचारविरोधी अभियानमा जुट्न पनि पार्टीका नेता–कार्यकर्तालाई सचेत गराए । न्युज एजेन्सी नेपाल