भाषा र भोजपुरी भाषा
(भाषाशास्त्र:गोपाल अश्क र डा. विश्वम्भरकुमार शर्मा)
भोजपुरी भाषा साहित्यमा सक्रिय रहेका दुई साहित्यकार हुन् गोपाल अश्क र डा. विश्वम्भरकुमार शर्मा । यिनै साहित्यकारहरूले लेखेको संयुक्त कृति हो ‘भाषा र भोजपुरी भाषा’ । कृतिमा भोजपुरी भाषाका बारेमा विविध विषयवस्तु समेटिएको छ । 

यसभित्र लेखकद्वयले आफ्नो भनाइमा लेखेका छन्:‘...यो पुस्तक ‘भोजपुरी भाषाको उद्भव र विकास’, ‘भोजपुरी भाषाका भाषिक भेदहरू’, ‘यस भाषामाथि अर्को भाषाको प्रभाव’, ‘भोजपुरीको मौलिक स्वरूप’, ‘भोजपुरीका व्याकारिकरण कोटिहरू’, ‘नेपालमा भोजपुरी भाषा र साहित्य’ तथा ‘भोजपुरी वर्णविन्यासमा देखिएको समस्या र तिनको समाधान’को बारेमा जान्ने विद्यार्थी, पाठक तथा अध्ययन अनुसन्धानकर्ताहरूका लागि उपयोगी सिद्ध हुनेछ भन्ने हाम्रो विश्वास छ ।’

कृतिभित्र १२ भागमा भोजपुरी भाषाका अनेक आयामहरू प्रस्तुत छन् ।
 
ऐरावती प्रकाशन प्रा.लि.द्वारा प्रकाशित २१६+४ पृष्ठको यस पुस्तकको मूल्य ३००– रुपैयाँ राखिएको छ ।

०००

आमा
(कवितासंग्रह:मञ्जुल/शिव गौतम/तीर्थ श्रेष्ठ)
नेपाली कविताका क्षेत्रमा चर्चामा रहेका व्यक्तित्व हुन् मञ्जुल र तीर्थ श्रेष्ठ । त्यसैमा थपिएका छन् कवि शिव गौतम । उनी कविता सिर्जना गर्दै आइरहेका छन् । यी तीन कविहरूको संयुक्त कवितासंग्रह ‘आमा’ केही समयअघि प्रकाशनमा आएको छ । यी तीनै कविहरूले आमामाथि लेखेका आआफ्ना कविताहरूलाई यस संग्रहमा समावेश गरेका छन् ।

यस कविताकृतिमा साहित्यकार सुस्मिता नेपाल लेख्छिन्– आमा व्यक्ति मात्र नभई उनी विशाल मातृत्व पनि हुन् । ...यस संग्रहका तीनैजना कविले आफ्ना आमा र सम्पूर्ण आमाहरूप्रति एउटा सन्तानले गर्ने माया, आदरभाव हृदयका पानाहरूबाट नै पस्केका छन् ।

कृतिभित्र तीर्थ श्रेष्ठका १५, शिव गौतमका २० र मञ्जुलका २० आमा विषयक कविता समेटिएका छन् ।

शिव गौतमद्वारा प्रकाशित ८८+४ पृष्ठको यस कविताकृतिको मूल्य २५०– रुपैयाँ राखिएको छ ।

०००

एउटा प्रश्न 
(लघुकथासंग्रह:हेमलता उप्रेती)
लेखक हेमलता उप्रेतीको लघुकथाकृति हो ‘एउटा प्रश्न’ । लघुकथा लेखनमा सक्रिय हेमलताको यो दोस्रो कृति हो । यसअघि उनको एउटा लघुकथाकृति प्रकाशित छ । 

कृतिभित्र ‘स्मृतिमा हेमलता’मा विष्णुप्रसाद उप्रेती लेख्छन्– हेमलता मेरा लागि एक्लो सन्तान मात्र नभएर, प्रेरणाको स्रोत, आदर्श गुरु र कुशल मार्ग निर्देशकसम्म थिइन् । उनैको आग्रहले म आज साहित्यको क ख सिक्ने क्रममा छु ।

नारी श्रष्टा समाज, विराटनगरद्वारा प्रकाशित १३२+४ पृष्ठको यस लघुकथासंग्रहको मूल्य ३००– रुपैयाँ राखिएको छ ।

०००

घुम्दै फिर्दै 
(यात्रा काव्यसंग्रह:जनार्दन खनाल)
हेटौँडामा बसेर साहित्य सिर्जनामा सक्रिय रहेका सर्जक जनार्दन खनालको पछिल्लो कृति हो ‘घुम्दै फिर्दै’ । जसलाई उनले यात्राकाव्य कृति भनेका छन् ।

फुटकर रूपमा कविता लेख्दै आएका खनालको यो पहिलो काव्य कृति हो । कृतिभित्र सबैमा आभार शीर्षकको काव्यमा कवि खनाल लेख्छन् :– 
सिर्जना गर्न हौसला दिने समस्तजनको
लेखिनु पर्थ्यो समस्त नाम कमजोरी मेरै हो
सबैमा मेरो हार्दिक साथ सदैब आदर
सम्पूर्णप्रति नमन साथै गर्दछु आभार ।
कवि खनालले गोसाइँकुण्ड यात्रालाई २५३ टुक्राका काव्यभावनामा उनेका छन् । शैक्षिक क्षेत्रमा लामो समय बिताएका कवि जनार्दन खनालको काव्यकृतिप्रति प्रकाशकीयमा लेखिएको छ– 
...जीवनभरि चेतना बाँडे धन्य भो समाज
जोडेर हात नमन गरौँ सबैले लौ आज । 
झरनासँगै हेलिए सधैँ बन्ने छन् सरिता
राख्ने छन् कीर्ति लेखेर यस्तै छन्दका कविता ।...

झरना साहित्यिक परिवार, मकवानपुरद्वारा प्रकाशित १८४+४ पृष्ठको यस काव्यकृतिको मूल्य २००– रुपैयाँ राखिएको छ ।