काठमाडौं । नवनियुक्त खेलकुदमन्त्री विराजभक्त श्रेष्ठले रौतहटमा सञ्चालनमा आउन नसकेको महिला फुटबल एकेडेमीप्रति चासो देखाएका छन् । रौतहट जिल्ला फुटबल संघका अध्यक्ष भगवान दर्लामीले महिला फुटबल एकेडेमीप्रति नवनियुक्त खेलकुदमन्त्रीले चासो राखेको बताए ।

“नवनियुक्त खेलकुदमन्त्रीज्युले एकेडेमीप्रति चासो देखाउनुभएको छ । उहाँको स्वकीय सचिवले फोन गरेर एकेडेमी कसरी सञ्चालनमा आउँछ भन्ने कुरा गर्नुभयो,” दर्लामीले बाह्रखरीसँग भने, “एकेडेमी सञ्चालनमा आउन नदिन केही तत्व लागेकै हुन् । तर, अबको केही समयपछि नै एकेडेमी सञ्चालनबारे निर्णय आउनेछ ।”

विश्व फुटबलको सर्वोच्च निकाय फिफाको ‘फिफा फरवार्ड प्रोजेक्ट’ अन्तर्गत चार वर्षअघि एकेडेमीको निर्माण सुरु भएको थियो । त्यसको एक वर्षभित्रै एकेडेमी निर्माणको काम सम्पन्न भएको थियो । तर, २०७६ माघमा अखिल नेपाल फुटबल संघ (एन्फा)कै पूर्वकानुनी सल्लाहकार सुजित केसीले सर्वोच्चमा रिटमा अदालतले अन्तरिम आदेश जारी गरेपछि एकेडेमी सञ्चालनमा आउन सकेको छैन । अध्यक्ष दर्लामीले भने एकेडेमी आगामी वर्षभित्र सञ्चालनमा आउने विश्वास व्यक्त गरे ।

“अदालतको मुद्दा समाधानतर्फ छ । सम्भवतः आगामी वर्षभित्र एकेडेमी सञ्चालनमा आउनेछ । एन्फाबाट पनि यू–१४ टोलीलाई एकेडेमीमा राख्ने कुरामा छलफल भइरहेको छ । यसबारे चाँडै नै निर्णय आउनेछ,” उनले भने ।