काठमाडौं । साफ यू–१६ महिला च्याम्पियनसिपअन्तर्गत लिग चरणको आफ्नो अन्तिम खेलमा भारतविरुद्ध नेपालले पहिलो हाफमा आधा दर्जन गोल बेहोरेको छ । 

बिहीबार सातदोबाटोस्थित एन्फा मुख्यालयमा जारी खेलमा नेपाल पहिलो हाफमै ६–० ले पछि परेको हो । पहिलो हाफमा पउल फर्नान्डेजले दुई गोल गरिन् । यस्तै, अनिता ढुङ्डुङ, अनुस्का कुमारी, बोनिफिला सुल्लाई र गुरलिन गौरले समान एक गोल थपे । तेस्रो मिनेटमा अनिता ढुङ्डुङले गोल गर्दै भारतलाई अग्रतामा राखेकी थिइन् । 

पाउलले १३औँ मिनेटमा गोल गर्दै भारतको अग्रता दोब्बर बनाइन् । २२औँ मिनेटमा अनुस्का कुमारी भारतका लागि तेस्रो गोल थपिन् । २५औँ मिनेटमा बोनिफिला सुल्लाईको गोलमा भारतले अग्रता ४–० मा पुर्‍यायो । ३३औँ मिनेटमा गुरलिन कौरले गोल गर्दै भारतको अग्रतालाई ५–० मा पुर्‍याइन् । 

यस्तै, ४४औँ मिनेटमा पउल फर्नान्डेज दोस्रो गोल गरेपछि भारतले पहिलो हाफमै ६–० को अग्रता बनाएकी हुन् । फाइनल प्रवेशका लागि नेपाललाई आज जित्नैपर्ने दबाब छ । नेपालले यसअघिका दुई खेलमध्ये एकमा हार र एकमा जित निकालेको थियो । आजको खेलमा जित निकाले नेपालले उपाधिका लागि बंगलादेशको भीडन्त निश्चित गर्नेछ । 

नेपालले पहिलो खेलमा बंगलादेशसँग २–० को हार व्यहोरेको थियो । नेपालले दोस्रो खेलमा भुटानलाई ३–० ले हराएको थियो । भारत पनि आज नेपाललाई हराउँदै फाइनलमा पुग्ने दाउमा छ । भारतले पहिलो खेलमा भुटानलाई ७–० ले हराएको थियो । दोस्रो खेलमा भारतले बंगलादेशसँग ३–१ को हार व्यहोरेको थियो ।