काठमाडौं । अख्तियार दुरुपयोग अनुसन्धान आयोगले सघन सहरी तथा भवन निर्माण कार्यालय राजविराजका तत्कालीन आयोजना प्रमुख सचिन्द्रकुमार देवसहित चारजनाविरुद्ध भ्रष्टाचार मुद्दा दायर गरेको छ । उनीहरूले गैरकानुनी लाभहानि पुर्‍याई भ्रष्टाचार गरेको ठहर गर्दै अख्तियारले मंगलबार विशेष अदालतमा मुद्दा दायर गरेको हो ।

अख्तियारले मुद्दा दायर गरेका अरू व्यक्तिमा तत्कालीन इन्जिनियर मदन राय, सबइन्जिनियर सरोजकुमार यादव र गुन्जा कन्स्ट्रक्सनका प्रोपराइटर गोविन्दप्रसाद मण्डल छन् । उनीहरू सबैसँग तीन लाख ४७ हजार रुपैयाँ बिगो दाबी गरिएको छ ।

सप्तरीको हनुमाननगर कंकालिनी नगरपालिका–४, मधुवापुर वडा कार्यालयदेखि अर्जी टोलसम्म लगभग ३०० मिटर दूरीमा कालोपत्र बाटो निर्माण गरिएको थियो । उक्त बाटो बिनाटेन्डर भएको, होडिङ बोर्ड नलगाएको र निर्माण कार्य राम्रो नभएको भन्ने उजुरी परेपछि अख्तियारले अनुसन्धान अघि बढाएको थियो ।

तत्कालीन आयोजना प्रमुख देव, इन्जिनियर राय, सबइन्जिनियर यादवले उक्त कार्यमा बढी भुक्तानी दिएको पाइएपछि मुद्दा दायर गरिएको अख्तियारले जनाएको छ ।

गुन्जा कन्स्ट्रक्सनका प्रोपराइटर मण्डलले सर्त एवं सम्झौताबमोजिमको कार्य नगरेको र गरेको भन्दा बढी मूल्यांकन गराई भुक्तानी लिएको पाइएपछि मुद्दा दायर गरिएको अख्तियारद्वारा जारी विज्ञप्तिमा उल्लेख छ ।