काठमाडौं । साफ यू–१६ महिला च्याम्पियनसिपमा भुटानमाथि नेपालले ३–० को सहज जित निकालेको छ । सोमबार सातदोबाटोस्थित एन्फा मुख्यालयमा सम्पन्न खेलमा नेपाललाई जित दिलाउन पूजा गिरी, कप्तान भूमिका बुढाथोकी र ग्यान्छु डोल्मा लोले समान एक गोल गरे । 

खेलको १४औँ मिनेटमा पूजाले गोल गर्दै घरेलु टिमलाई अग्रता दिलाएकी थिइन् । त्यसको चार मिनेटपछि नै कप्तान भूमिकाले नेपालको अग्रता दोब्बर बनाइन् । यस्तै, ३०औँ मिनेटमा ग्यान्छुले गोल गर्दा नेपालले अग्रतालाई ३–० मा पुर्‍याएको थियो । पहिलो हाफमै ३–० को सहज अग्रता बनाएको नेपालले दोस्रो हाफमा भने गोल थप्न सकेन । 

खेलको ३८औँ मिनेटमा भुटानले गोलको सुनौलो अवसर गुमायो । भुटानले पेनाल्टी पाए पनि छिरिङ ल्होमोको प्रहार नेपालकी गोलकिपर झरना दुम्राकोटीले विफल बनाइन् । 

प्रतियोगितामा नेपालको यो पहिलो जित हो । नेपालले यसअघि पहिलो खेलमा भने बंगलादेशसँग २–० को हार बेहोरेको थियो । यता, लगातार दोस्रो हार बेहोरेको भुटान भने लिग चरणको अन्तिम खेलअगावै फाइनल पुग्ने समीकरणबाट बाहिरिएको छ ।

भुटानले यसअघि पहिलो खेलमा भारतसँग ७–० को हार बेहोरेको थियो । लिग चरणको अन्तिम खेलमा अब नेपालले भारतसँग र भुटानले बंगलादेशसँग खेल्नेछन् ।