काठमाडौं । नेपाल दूरसञ्चार प्राधिकरणले अघि सारेको मोबाइल डिभाइस म्यानेजमेन्ट सिस्टम (एमडीएमएस) यतिबेला विवादित छ । एमडीएमएस प्रणाली खरिदमा भ्रष्टाचार भएको भन्दै अख्तियार दूरुपयोग अनुसन्धान आयोगले छानबिन गरिरहेको छ ।

हाल अन्यौलको अवस्थामा रहेको एमडीएमएस प्रणालीमार्फत प्राधिकरणले गत कात्तिकमा ८०३ आइफोन ब्लक गरेको थियो । प्रणालीमा दर्ता नभएको भन्दै प्राधिकरणले कात्तिक २० गते रातिदेखि ती फोनमा दूरसञ्चार सेवा बन्द गरेको थियो ।

त्यतिबेला एमडीएमएसमा दर्ता नभएका फोनहरू क्रमशः महँगोदेखि सस्तो फोन बन्द गर्ने प्राधिकरणको तयारी थियो । त्यससँगै ती फोनमा सीम कार्ड हालेर चल्ने सेवा बन्द भएका थिए ।

अहिले एमडीएमएस विवादित भएर यथास्थितिमा रहेका बेला ती फोनका उपभोक्ताले भने फोन खुलाउन नपाएर सास्ती पाएका छन् ।

ब्लक गरिएका फोन खुलाउने बाटो छैन
प्राधिकरणले दूरसञ्चार सेवा बन्द गरिएका वा ब्लक गरिएको फोन अनब्लक गर्ने वा खुला गर्ने व्यवस्था नभएको बताएको छ । प्राधिकरणका प्रवक्ता सन्तोष पौडेलले ब्लक गरिएका फोन खुलाउने बाटो नभएको बताए ।

“एमडीएमएसबाट ब्लक गरिएका फोन खुलाउने बाटो छैन । भन्सार शुल्क वा कर तिरेर खुलाउने बाटो पनि अहिले छैन,” प्राधिकरणका निर्देशक समेत रहेका पौडेलले भने ।

०७६ सालमा हालको विनिमयअनुसार करिब ९० करोड रुपैयाँ (७० लाख ६६ हजार अमेरिकी डलर)मा एमडीएमएस प्रणाली खरिदका लागि ठेक्का भएको थियो ।