काठमाडौं । राष्ट्रिय स्वतन्त्र पार्टी (रास्वपा)का सांसद गणेश पराजुलीले सर्वसाधारण नागरिकले बनाएका संरचनाको सुनिश्चितताबारे ध्यान दिन आवश्यक रहेको बताएका छन् । प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिको बिहीबारको बैठकमा उनले गुणस्तरहीन छडका विषयमा यस्तो बताएका हुन् ।

निर्माण कार्यमा प्रयोग हुने गुणस्तरहीन छडका कारण सर्वसाधारण नागरिकले बनाएका संरचना जोखिमयुक्त रहेको भन्दै उनले सरकारले विशेष ध्यान दिन आवश्यक रहेको उल्लेख गरे । सर्वसाधारण नागरिकले बनाएका संरचनामा छडजन्य सामग्रीको गुणस्तर मापन नहुने भएकाले सरकारले विशेष जोड दिएर अघि बढ्न आवश्यक रहेको उनले औँल्याए ।

“निर्माण प्रक्रियामा जब ठूलाठूला प्रोजेक्टहरूले त गुणस्तर मापन गर्दछन् । तर, सर्वसाधारण नागरिकहरूले बनाएका संरचनाहरूको ग्यारेन्टीको जिम्मेवारी कसले लिने ? यदि छडहरू गुणस्तरहीन छन् र बनेको संरचनाहरू साँच्चै जोखिमयुक्त छन् भने त्यसको जिम्मेवारी कसले लिने ? यो पाटोबाट पनि ध्यानाकर्षण गराउँछु,” उनले भने ।

उनले सबै उद्योग समान रूपमा सञ्चालनका निम्ति पहल गर्नुपर्ने आवश्यकता रहेको पनि बताए । नेपालभित्रै सम्भावना भएको खानीलाई सञ्चालन गर्न कस्तो खालको उद्योग स्थापना आवश्यक हुन्छ भन्ने बारेमा छलफल हुन जरुरी रहेको उनको भनाइ छ ।

उनले नेपालमा रोजगारी बढी दिन सक्ने उद्योगको सञ्चालन आवश्यक रहेको बताए । न्युज एजेन्सी नेपाल